Во борбата за „Златната топка“ останаа уште само тројца фудбалери. Веќе сме навикнати на Кристијано Роналдо и на Лионел Меси, кои секоја година се во игра за престижната награда на ФИФА и на „Франс фудбал“, но годинава друштво на најголемите ѕвезди на Реал Мадрид и на Барселона ќе им прави репрезентативниот голман на Германија и на Баерн Минхен, Мануел Нојер.
Минатата сезона наградата „Златна топка“ заврши во рацете на Кристијано Роналдо, а и годинава Португалецот е прв фаворит. Меѓу тие што не го симпатизираат фудбалерот на кралскиот тим е и Томас Милер, тимскиот колега на Мануел Нојер.
– Јас не сум за тоа Роналдо повторно да ја освои „Златната топка“. Тоа ќе биде премногу здодевно. Нојер е фантастичен во изминатите неколку сезони и ја заслужува престижната награда. Го освои пехарот кој е наменет за светскиот шампион и нема ништо случајно во тоа што е помеѓу тројцата кандидати за престижната награда – изјави Томас Милер.