fbpx

Шпанките за првпат го освоија Светското првенство во фудбал, совладувајќи ја Англија во финалето

Шпанија е петтиот победник во деветте изданија на Светскиот куп за жени и ѝ се придружи на Германија како единствените две нации што го освоиле и машкиот и женскиот турнир

-

Шпанија ја порази Англија со 1-0 во финалето на Светското фудбалско првенство за жени, завршувајќи го турнирот кој собори рекорди во посетеност и телевизиска гледаност и кој ги зголеми надежите за зголемен интерес за женската игра.

Домаќини на деветтиот по ред светски шампионат беа Австралија и Нов Зеланд, со што овој настан за првпат се одржа на јужната хемисфера, пренесува Ројтерс.

Единствениот гол на натпреварот, по удар со левата нога, го постигна Олга Кармона во 29-тата минута од натпреварот.

Шпанија имаше шанса да го удвои водството во 68-мата минута, но обидот од пенал на Џени Хермосо го одбрани Мери Ерпс.

Кармона го постигна победничкиот гол и во 89-тата минута во полуфиналниот натпревар против Шведска, со што таа стана првиот играч по Карли Лојд во 2015 година што постигнала гол во полуфинале и во финале на едно светско првенство.

И покрај тоа што локалниот интерес се намалил кога Австралија испадна во полуфиналето, два милиони навивачи поминаа низ портите во деветте градови-домаќини, а финалето што се одржа денеска го следеле над 75.000 навивачи.

Шпанија е петтиот победник во деветте изданија на Светскиот куп за жени и ѝ се придружи на Германија како единствените две нации што го освоиле и машкиот и женскиот турнир.

Победата на Шпанија доаѓа и покрај бунтот на играчите минатата година, кога петнаесет од нив рекоа дека се повлекуваат од националниот тим поради нивното ментално здравје, а повикаа и на попрофесионална средина за играње, пренесува Асошиејтед Прес.

 

Нашите вести во вашето сандаче

Секој ден во 17 ч. добивајте ги вестите од Новинската агенција Мета директно на вашата електронска адреса.

Ве молиме одберете на кој начин сакате да добивате информации од нас:
Можете да се отпишете од оваа листа преку линкот на крајот од нашите пораки.