Во Македонија се влошуваат меѓуентичките односи, а главни виновници за тоа се политичките партии.
Ова беше заклучокот на трибината „Влијанието на евроатлантските интеграции врз меѓуетничките односи“, која се одржа на Државниот универзитет Тетово.
– Во Македонија партиите се со етнички предзнак, а тоа е многу погубно за самата демократија и за меѓуетничкиот соживот. Ваквите партии ги влошуваат меѓуетничките односи и треба конечно да се создаде силна граѓанска партија – изјави Трифун Костовски од бизнис-клубот во рамките на Евроатлантскиот совет на Македонија.
Исмет Рамадани од Евроатлантскиот совет на Македонија, кој учествуваше на трибината, изјави дека со зачленување на Македонија во ЕУ и во НАТО, меѓуетничките односи во Македонија ќе се подобрат.
– Ако во Македонија се прифатат правилата на игра што важат во Европската Унија, тогаш ќе созрее демократија, ќе има слободни медиуми, а со тоа ќе се релаксираат и меѓуетничките односи – изјави Рамадани.
Трибини од ваков вид ќе се одржат и во други градови во Македонија.
