Меѓународниот суд на правдата на ОН во Хаг во понеделник ги продолжува сослушувањата за тужбата на Украина против Русија во врска со Конвенцијата за геноцид, пишува Укринформ.
Од утре до 27 септември ќе се одржат јавни расправи за прелиминарните приговори изнесени од Русија. Сослушувањата ќе се одржат во два круга: претставниците на Русија ќе зборуваат на 18 и на 25 септември, а претставниците на Украина ќе имаат збор на 19 и на 27 септември.
Спорот се однесува на толкувањето, примената и спроведувањето на Конвенцијата за спречување и казнување на злосторството геноцид од 1948 година. Во тужбата поднесена против Руската Федерација до Меѓународниот суд на ОН, Украина бара Русија да биде повикана на одговорност за искривување на концептот на „геноцид“.
Украина ја поднесе тужбата на 26 февруари 2022 година, два дена откако Русија изврши целосен упад во земјата.
Вкупно 32 држави се приклучија кон случајот со свои интервенции, пренесува Укринформ. Тие ќе учествуваат и на судското рочиште.
На 5 јуни 2023 година, Меѓународниот суд на правдата донесе наредба со која се потврдува дека интервенциите на 32 држави се прифатливи. Ова е рекорден број на држави учеснички во историјата, односно 34 од 193 членки на ОН (речиси 20 проценти), учествуваат во судењето.
