Најмалку 12 загинати и 78 повредени е последниот биланс од пожарот во лондонскиот облакодер Гренфел тауер, јавуваат британските медиуми, додавајќи дека 18 лица се наоѓаат во критична состојба.
Градоначалникот на Лондон, Садик Кан, изјави дека бројот на жртвите би можел да се зголеми, имајќи предвид дека сè уште има луѓе што се водат како исчезнати.
Неофицијално, причината за несреќата е лесно запаливата изолација на зградата во која се наоѓаат 120 социјални станови. Сепак, истрагата за несреќата допрва ќе треба да ги открие вистинските причини и дали неквалитетните материјали при реновирањето на фасадата, кое беше завршена завршено минатата година, придонеле за разгорување на пламенот.
– Сега се води комплексна операција што ќе трае повеќе денови – изјави командантот на лондонската полиција, Стујарт Канди, кој рече дека не очекува да бидат пронајдени преживеани.
Пожарот изби вчера, по полноќ, а огнената стихија бргу се проширила низ сите катови од зградата.
