Тројца прилепчани, Т.Ѓ. (61), Д.Н. (35) и М.Г. (36), и локална фирма се осомничени дека сториле кривично дело измама, информира полицијата.
Осомничените, според информациите, во текот на мај 2014 година ја презеле локалната фирма „Гризли дан“,и покрај тоа што знаеле дека е неликвидна и неспособна за плаќање.
Сопственик и управител на фирмата првин станал Д.Н., кој заедно со другите склучил претплатнички договор со мобилен оператор, од каде земале шест мобилни телефони и направиле долг од околу 89.000 денари.
По еден месец, како одговорно лице на фирмата бил впишан М.Г., кој заедно со Т.Ѓ. на почетокот на јули потпишал договор за купопродажба на производи од фирма од Берово за сума од околу 261.000 денари, прикажувајќи ја „Гризли дан“ како ликвидна фирма.
Набавената стока пријавените не ја евидентирале во книговодството, со што, според полицијата, стекнале противправна имотна корист од околу 350.000 денари.
