Претседателот на Владата на Северна Македонија, Димитар Ковачевски го осуди чинот на отворената воена агресија на Руската Федерација на Украина.
„Го осудувам чинот на отворена воена агресија од страна на Русија врз Украина. Војната е најлошиот начин за решавање на недоразбирањата, а агресијата врз Украина е закана и за европскиот и светскиот мир.
Владата ја следи многу внимателно состојбата во Украина. Безбедносната состојба во нашата земја е стабилна и во овој момент не постои директна закана за безбедноста на Северна Македонија.
Покрај безбедносната состојба, владата одблиску ги следи и промените во светските економски текови кои се дестабилизирани од новонастанатата состојба. Владата како и досега ќе делува максимално одговорно и во најдобар интерес на заштита на домашната економија и финансиската состојба на граѓаните“, напиша премиерот Ковачевски.
Предходно, по утринските напади со кои Русија ја започна воената инвазија на Украина претседателот Стево Пендаровски свика седница на Советот за безбедност на која ќе се дискутира за руската агресија врз Украина.
