По одлуката на Владата за замрзнување на цената на лебот на 33 денари, Државниот пазарен инспекторат (ДПИ) претходната недела извршил 300 контроли и издал прекршочни платни налози на трговски објекти во вредност од 960.000 денари, или над 15 илјади евра.
Ова на својот профил на Фејсбук го објави директорот на ДПИ, Горан Трајковски.
„Пазарниот инспекторат е на терен и интензивно спроведува контроли!“, пишува тој.
Трајковски информираше и дека претходната недела Државниот пазарен инспекторат има извршено 750 надзори во трговски објекти на територијата на цела Македонија.
„Издадени се над 65 прекршочни платни налози со вредност од над 3 милиони денари“, информира тој.
Владата на вчерашната седница ги намали цените на шпагетите и макароните за 15 проценти, во однос на цените што ги имале овие производи на 1 март годинава.Понатаму, за 10 отсто се намалува цената на трајно кравјо млеко со масленост од 2,8%, 3,2% и 3,5%; урда; кравјo бело сирење и мешано бело сирење; кравји кашкавал (со исклучок на кравји кашкавал без додатоци и пармезан); кисело млеко; павлака и јогурт, без додатоци.
Од ДПИ изјавија дека казните за непочитување на владината одлука за намалување на цените на тестенините и на млечните производи ќе изнесуваат од 800 до 10.000 евра, во зависност од видот и големината на економскиот оператор.
