Познатиoт канадски ликовен уметник и синеист од македонско потекло, Мајкл Клос, кој живее во Торонто, целокупната своја оставнина ја пренесува во сопственост на Република Македонија.
Станува збор за творештво создавано во изминативе 30 години. Оригинални документи, дневникот што го водел во три книги, слајдови, каталози, писма до светски лидери со кои лобирал за признавањето на Република Македонија под уставното име, како и една колекција цртежи и слики на платно.
Сето тоа ќе биде сместено и изложено во посебна просторија во подрачното одделение на Државниот архив на Македонија во Охрид, на очиглед на јавноста.
Официјалното предавање ќе се случи вечерва од 18 часот, на манифестацијата „Отворен ден на архивите“, организирана по повод националниот празник 2 Август – Денот на Републиката.
– Македонија се гради и од Торонто. Се сконцентриравме еден период на Њујорк, каде изложував во галерии и во македонската мисија на Обеднитетите нации (ОН). Потоа се посветивме на Рим и на светиот престол – Ватикан. Имав самостојна изложба во хотелот „Континентал“, а потоа и во Ватикан – 20 слики на платно. Во нашето дипломатско претставништво оставивме 80 оригинални минијатури, кои ќе им бидат подарени на сите амбасадори во Ватикан. Исто толку минијатури и за истите официјални лица оставивме и претходно, за време на беатификацијата на Мајка Тереза – вели Клос за „Мета“.
Сликарството е главна преокупација на Клос, но веќе долго време работи и како графички дизајнер и како сценограф.
Има работено на филмот „Тројца мажи и бебе“ и „Т и Т“. Делата честопати ги донира за да им помогне на добротворните организации.
