Шефот на Делегацијата на Европската Унија, Самуел Жбогар, в понеделник ќе ја посети Струмица како дел од новата кампања „ЕУ за тебе“.
Кампањата „ЕУ за тебе“ започна на 27 јануари во Кичево, со цел да се подигне свеста и да се информира јавноста за помошта на ЕУ во земјата.
„Во Струмица ЕУ обезбеди финансии од 5,7 милиони евра за изградба на фабрика за третман на отпадни води, надзор и студии. Овој проект се спроведува во соработка со Министерството за животна средина и просторно планирање, Општина Струмица и во соработка со локалните јавни комунални претпријатија. Кога ќе биде завршен, за третманот на отпадните води треба да се постигнат стандардите за квалитет што се бараат според Директивата на ЕУ за урбани отпадни води и според соодветното национално законодавство“, информираат од Делегацијата на ЕУ.
Целокупната помош на Европската Унија во областа на животната средина е во износ од повеќе 80 милиони евра во рамките на ИПА 1 (2007-2013), додека натамошна поддршка од 100 милиони евра се планираат во рамки на ИПА 2.
