Предвремените парламентарни избори ќе бидат излез од кризата, но само доколку по изборите се деблокираат интеграциите на Република Македонија, порача претседателот Ѓорге Иванов во синоќешното обраќање на свечениот прием за учесниците на 15. Есенска сесија на Парламентарното собрание на ОБСЕ, што се одржа во Музејот на македонската борба.
Според Иванов, блокадата на европската и на евроатлантската интеграција на Република Македонија стана една од главните причини за постојаната политичка криза што, нагласи тој, кулминираше годинава и со тоа последиците од блокадите станаа причини за нови блокади.
– Верувам дека предвремените парламентарни избори ќе бидат излез од кризата, но само доколку по изборите се деблокираат интеграциите. Само со отворање на европските перспективи за македонските граѓани, ќе се излезе од маѓепсаниот круг на политички кризи и на недоверба – рече Иванов.
На ОБСЕ, како што посочи шефот на државата, ѝ биле потребни речиси четири долги години за да ја прифати реалноста на македонската државност и позитивно да одговори на нашето барање за членство.
– Иако бевме неправедно блокирани, не се откажавме од ОБСЕ бидејќи длабоко верувавме во исправноста на принципите на демократијата, човековите права и слободи, правото на човечкото достоинство, почитувањето на меѓународното право и во владеењето на правото како услов за добро владеење. Не се откажавме бидејќи верувавме во ОБСЕ. Таа наша доверба и истрајност се исплатеше. Влогот и ангажманот на ОБСЕ во Македонија беше значаен. Ни помогна да достигнеме многу европски стандарди, критериуми и вредности. Благодарение на сето тоа, од корисник на услугите, денес, мојата држава е активен придонесувач во целите на Организацијата. И преку македонскиот модел на соживот и почитување на различноста, и преку добрососедските односи – рече Иванов на собирот.
Есенската сесија на Парламентарното собрание на ОБСЕ почна на 29 септември, а завршува денеска. Станува збор за најголемиот меѓународен парламентарен настан организиран во историјата на Република Македонија, со учество на делегации од 51 земја, членки на ОБСЕ, 370 пријавени учесници, од кои 220 пратеници.
Годинава темата на парламентарната конференција е „Зајакнување на мерките за градење доверба и добро управување во регионот на ОБСЕ“.
