Американската администрација вчера го испрати нуклеарниот договор со Иран во Конгресот, со што почнува 60-дневниот рок за носење одлука, за која интензивно ќе лобираат и заговорниците и противниците на договорот.
Портпаролот на Стејт департментот, Џон Кирби, рече дека во согласност со законот, нуклеарната спогодба, постигната во вторникот меѓу Иран и шесте светски сили, испратена е во Конгресот на разгледување.
„Тоа значи дека ревизискиот период од 60 дена почнува в понеделник, 20 јули“, рече Кирби во писмената изјава.
Советот за безбедност на ОН веќе работи на подготовка на гласањето за отстранување на санкциите кон Иран, кои беа дел од договорот за официјален Техеран да се откаже од својата нуклеарна програма. Сепак, отстранувањето на санкциите ќе се случи откако Меѓународната агенција за атомска енергија (МААЕ) ќе потврди дека Техеран ги исполнува обврските за намалување на складираното количество збогатен ураниум.
Санкциите беа воведени пред девет години и го погодуваат иранскиот финансиски сектор, на кој му се замрзнати средствата во банките и финансиските институции, а на иранските претставници им е забрането патување во странство.
Гласањето во ОН нема да има влијание на засебните санкции кои ЕУ, САД и другите земји му ги наметнаа на Иран.
