Македонија годинава е меѓу првите земји во регионот во однос на препораките на Европска комисија од Програмата за економски реформи, за периодот од мај 2019 година до јануари 2020 година, кои се однесуваат на реформски мерки за јакнење на финансиската стабилност и креирање на работни места. Тоа е заклучокот од денешниот онлајн, редовен, годишен Економски и финансиски дијалог помеѓу ЕУ и Западен Балкан и Турција, на кој учествуваа министерката за финансии Нина Ангеловска и гувернерката на Нaродната банка, Анита Ангеловска-Бежоска.

Како што соопшти Министерството за финансии, министерката Ангеловска посочила дека е добра реализацијата на реформите во поглед на социјалната заштита, како и спроведувањето на мерката за младинска гаранција, а се преземаат напори за справување со најгорливиот проблем, сивата економија, за која Министерството за финансии изготви акциски план. Станало збор за справувањето со Ковид-19 кризата и се размениле искуства за краткорочните и среднорочните мерки за справување на последиците.

Гувернерката Анита Ангеловска-Бежоска посочила на успешното остварување на монетарните цели и на брзата реакција на Народна банка за ублажување на ефектите од корона-кризата, која ќе продолжи посветено да работи на спроведување на препораките од Програмата за економски реформи за наредниот период, што овозможуваат побрзо усогласување со европските стандарди.