ЕУ би можела да ги укине визите за граѓаните на Турција, а услов за тоа е спогодбата за реадмисија, соопшти еврокомесарот за проширување, Јоханес Хан.
Еврокомесарот, за време на гостувањето на австриската државната телевизија ОРФ, рече дека визната либерализација со Турција е апсолутно реална во рок од 12 месеци, истакнувајќи дека Анкара мора да го прифати договорот за реадмисија. Тоа би овозможило бегалците што ќе дојдат во Европа да бидат вратени во Турција, објасни Хан, негирајќи дека ЕУ прави отстапки за Анкара поради бегалската криза.
ЕУ, според Хан, нема да замижува пред кршењето на човековите права или конфликтите со Курдите, ниту, пак, ќе одвои повеќе од планираните три милијарди евра за поддршка на бегалците во Турција.
Хан истовремено се заложи за заживување на пристапните преговори со Турција и рече дека тие се единствен инструмент за истакнување на значењето на човековите права. Од тие причини, Хан смета дека најпрво треба да се отвори поглавјето за основните права.