„Народот застанува против виткањето „кичми“, против сценаријата за дестабилизација, против уривањето на мирот и на соживотот. Македонија е многу повеќе од ова. Сето ова ќе помине и на крајот сите ќе треба да се погледнеме во огледало, и ние кои сега сме со народот, а и тие кои се од другата страна. Историјата ќе суди за улогите, а народот ќе цени“. Ова го истакна денеска претседателот на ВМРО-ДПМНЕ, Никола Груевски, во Музејот на ВМРО, промовирајќи нов проект „Од град во село, за нов почеток“.
– Македонија подолг период е во акутна политичка криза и знам дека таа криза го нарушува спокојството на граѓаните, нивниот мир, секојдневието и таа се одразува и на економијата, иако засега економијата се држи солидно. Има и такви кои деновиве ги слушам во дел од медиумите кои порачуваат дека ситуацијата е безизлезна, нема надеж, дека нема светло на крајот од тунелот. Секој почеток има и свој крај, така е и со кризата. Политичката криза ќе се реши, а ние, сите ние ќе излеземе многу посилни од сето ова. Но, и помудри. Македонија ќе се врати на патеките на напредокот, на економскиот развој, на патот на ЕУ и на НАТО и колку и да сака некој, поради свои лични интереси, да нè одврати од оваа наша заедничка цел, тој нè прави порешителни, уште многу повеќе силни да опстоиме, да се бориме, но и да успееме. Македонија ќе продолжи да оди напред и да се развива – изјави Груевски.