Лице од возило во движење застрела полицајка пред резиденцијата на францускиот претседател Франсоа Оланд, јавуваат француските медиуми.
Автомобилот синоќа се движел во погрешна насока во еднонасочната улица кон Елисејската палата, а потоа возачот ја застрелал полицајката, која веднаш е хоспитализирана.
Како што јавуваат локалните медиуми, во автомобилот имало четири лица, кои веднаш по инцидентот го напуштиле местото, но две подоцна се уапсени. Полицијата сè уште трага по останатите двајца.
Инцидентот се случува во момент кога Франција воведе зголемена готовност по минатонеделните терористички напади во Париз, при кои загинаа 17 лица. Засега не се знае дали последниот инцидент е поврзан со минатонеделните напади.