Francë: Goditet një police para rezidencës së presidentit Hollande

Pas sulmeve terroriste të një jave më parë në Francë, janë shtuar masat e ruajtjes së sigurisë dhe rendit. Një police është goditur mbrëmjen e së mërkurës teksa ruante pallatin presidencial francez. Sipas zyrës së Prokurorit të Parisit, incidenti i shënuar së fundmi në afërsi të pallatit presidencial “Elysee” nuk ka asnjë lidhje me sulmet terroriste të një jave më parë. Bëhet e ditur se makina ku gjendeshin katër persona ka qenë duke ecur gabimisht në një rrugë njëkalimshe në drejtim të Pallatit “Elysee” dhe kur policja ka tentuar ta ndalë atë, ajo ka përfunduar e përplasur. Menjëherë automjeti është larguar nga vendngjarja, megjithatë policia ka arritur të arrestojë dy prej të arratisurve dhe është vënë në ndjekje të dy të tjerëve. Autoritetet e kanë cilësuar të qëllimshëm sulmin nga i cili policja ka pësuar lëndime në këmbë. Burimet e policisë kanë folur në kushte anonimiteti duke qenë se nuk janë të autorizuar të identifikohen publikisht.