Европската комисија го поздрави постигнатиот договор за назначување специјален јавен обвинител, соопшти Маја Коцијанчич, портпаролката на еврокомесарот Јоханес Хан за време на денешната редовна прес-конференција.
– Го поздравуваме договорот кој утринава во Скопје го постигнаа политичките партии за назначување на специјалниот јавен обвинител, кој беше важен елемент од политичкиот договор, кој беше посредуван од комесарот Хан и неколку европратеници во јуни и во јули. Сега го очекуваме усвојувањето на релевантниот закон во Собранието и очекуваме дека специјалниот обвинител ќе ја добие сета неопходна поддршка за да ја заврши важната задача – рече Коцијанчич.
Портпаролката на Хан ја потврди посетата на еврокомесарот на Македонија и додаде дека се очекува за време на посетата да се разговара и за претпристапните разговори на високо ниво (ХЛАД).
