Европската комисија денеска соопшти дека подготвува пакет од дополнителни 17 милиони евра за земјите од Западен Балкан што се соочуваат со голем прилив на бегалци.
„Србија и Македонија се соочени со неочекуван прилив на бегалци од надворешниот регион, што ја оптовари нивната инфраструктура. Приоритет е да се избегне ова да прерасне во нешто што е повеќе од краткорочна ситуација“, се наведува во соопштението.
Комисијата наведува дека овие земји треба да се поддржат со совети за работи во околности на мигрантска и на бегалска криза и директно да им се помогне во згрижувањето на тие луѓе на нивна територија.
Во соопштението се потсетува дека ЕУ досега упатила 78 милиони евра за унапредување на прифатните центри и на граничната контрола.
