Кон крајот на минатиот месец на локацијата кај стариот стадион во Тетово се појави нова дива депонија на инертен отпад, смет и други отпадоци од што се шири непријатна реа и дополнително се загадува воздухот и околината во Тетово.
Справувањето со градежниот шут се врши на начин на кој создавачот на отпадот треба самиот да го транспортира до специјално одредени депонии за негова селекција и преработка, но во случајот, бидејќи градот нема таков простор, за отпадот треба да се погрижи општинската власт.
На прес-конференцијата одржана по повод 100 дена од владеењето, градоначалникот на Општина Тетово, Биљал Касами изјави дека се работи на нов проект и решенија за справување со градежниот шут и другите видови отпад. Имено, на територијата на Полошкиот регион е потребна фабрика за преработка на инертниот отпад и негово искористување за енергетски цели, за чија изградба, како што рече градоначалникот, се во фаза на преговарање со инвеститори.
Креаторите на ново-настанатата депонија не се познати, а градските власти тврдат дека истата настанала уште во времето на претходната локална власт. Депонијата продолжува да се шири, при што по еден месец не е преземено ништо за нејзино чистење.
Од Општина Тетово велат дека се работи за комплексен проект, па разговорите продолжуваат во следниот период, а во моментов се разгледува тековната состојба и се прават планови, со цел да се изнајде најдобро решение, за менаџирањето со отпадот во Тетово, меѓу кој е и градежниот шут.