Движењето за реформи – ДПА од Уставниот суд бара да се преиспита уставноста на измените на Изборниот законик, со кој се предвидува проверка на 39.502 гласачи. Според партијата на Зијадин Села, измените што ги договорија четирите политички партии го кршат правото на глас загарантирано со Уставот каде се предвидува сите граѓани над 18 години кои се државјани на Македонија да можат да гласаат, пренесе телевизија ТВ 21.
– Се повикуваме на членот 22 од Уставот со кој се гарантира правото на граѓаните на глас и тука не е нагласено дали тие треба да бидат во, или надвор од државата на денот на изборите и дали ќе го искористат гласачкото право. Тие се државјани на Македонија и сите други проверки се непотребни. Затоа ја поднесовме иницијативата и Уставниот суд треба да одлучи дали е прекршен Уставот – вели Алим Фетаи од Движењето за реформи – ДПА.