По 15 часа преговори, работните групи на партиите потписнички на Договорот од Пржино, утринава постигнаа договор за изборните закони, дознава „Мета“.
Договорени се изборот и начинот на гласање во ДИК, гласањето на дијаспората и прочистување на избирачкиот список.
Членовите на ДИК ќе се избираат по формулата „три плус три плус три“, што значи по тројца претставници од власта и од опозицијата и тројца експерти што ќе се изберат во Собранието. Одлуките ќе се носат со апсолутно мнозинство.
Дијаспората ќе гласа во една изборна единица, со пропорционален модел, а ќе се избираат тројца пратеници.
Избирачкиот список ќе се прочистува комбинирано, односно теренски и со вкрстување на податоците од институциите.
Се очекува утре законот да влезе во собраниска процедура.
