Два американски воени авиони Ф-16 вчера прелетаа над небото на Босна и Херцеговина, на ден пред прославата на босанскиот ентитет Република Српска на 9 јануари како датум на нејзиното основање во 1992 година. Двата американски авиони на воздухопловството на САД вчера ја изведоа билатералната копнено-воздушна вежба заедно со вооружените сили на БиХ на подрачјето на Тузла и Брчко, пренесува сараевскиот весник Ослобоџење.
Летот на воените авиони Ф-16 беше извршен со поддршка и на авион за дополна на гориво КЦ-135 Стратотанкер, а од Амбасадата на САД во Сараево информираа дека станува збор за воена вежба на војската на САД и на босанските вооружени сили.
А во Бања Лука на прославата на 9 јануари присуствуваше целиот врв на босанскиот ентитет Република Српска предводен од Милорад Додик, како и голем дел од српскиот државен врв. На гости кај Додик беа присутни патријархот на Српската православна црква Порфириј, српскиот министер за одбрана Милош Вучевиќ, спикерот на српскиот парламент Владимир Орлиќ и началникот на генералштабот на српската војска Милан Мојсиловиќ.
На одбележувањето на денот на Република Српска беа присутни и поранешниот директор на српската Безбедносно-информативна агенција Александар Вулин, контроверзниот српски политичар Бранислав Несторовиќ и српскиот академик Матеја Беќковиќ, пишува Данас.
Милорад Додик на свечената академија за одбележување на денот на Република Српска, кој од Уставниот суд на БиХ е прогласен за неуставен, му го додели орденот од највисок вид на унгарскиот премиер Виктор Орбан. Орден со златен венец на Република Српска добија универзитетскиот професор Ненад Кецмановиќ и српскиот академик Матија Беќковиќ. Со орден со сребрен венец се закитија поранешниот српски амбасадор во БиХ Станимир Вукиќевиќ и српската министерка за здравство Даница Грујичиќ, а орденот „Његош“ го доби пејачот Мирко Пајчин, пренесува весникот Данас.
Самиот Милорад Додик не пропушти да даде распламтувачко интервју за агенцијата Франс-прес, во кој наведува дека Република Српска не сака да остане дел од БиХ. Целта на западните земји била да се обмесмисли постоењето на Република Српска, а и порача дека босанските Срби биле „ментално интегрирани со Србија“ и би поддржале независност на Република Српска. Додик вели дека над 80 овластувања на Република Српска веќе биле префрлени на централната власт во Сараево и тој си ги бара назад ваквите овластувања.
Со денешна реакција на прославата на денот на Република Српска се јави и бошњачкиот член на Претседателството на Босна и Херцеговина, Денис Беќировиќ. Тој денеска им оддаде почит со положување цвеќе на жртвите во Поточари, заедно со мајките од Сребреница и претставниците на Здружението „Мајките на енклавата Сребреница и Жепа“ и Здружението на жртви и сведоци на геноцидот.
„Босанскиот ентитет Република Српска е административно-територијална единица во рамките на независна, суверена, неделива и меѓународно призната држава Босна и Херцеговина. Ентитетот Република Српска егзистира во босанската држава од датумот на потпишување на Дејтонскиот мировен договор. Со Уставот на БиХ е јасно пропишано дека континуитет има само Босна и Херцеговина“, изјави Денис Беќировиќ, пренесува Ослобоџење.
По прославата во Бања Лука на денот на Република Српска, со реакција се јави и Денис Звиздиќ, заменик претседавач на Претставничкиот дом во босанскиот парламент, кој предупреди дека во Република Српска денеска била организира срамна, антицивилизациска и провокативна прослава која Уставниот суд ја прогласи за антиуставна.
„Непочитувањето на одлуките на Уставниот суд на БиХ е кривично дело“, порача Звиздиќ.
Тој порача дека босанските правосудни органи мора да реагираат во согласност со Кривичниот законик, бидејќи на 9 јануари 1992 година кога е создадена Република Српска претставува еден од најмрачните датуми во историјата на Босна и Херцеговина и означува почеток на убиства, силувања, мачења, прогон и концентрациони логори на сите припадници на несрпскиот народ во овој дел од БиХ, пишува Ослобоџење.
