Германската трипартиска коалиција на Олаф Шолц е во спор поради буџетот и затоа на земјата ѝ треба нова влада која ќе ја предводат демохристијаните, изјави лидерот на најголемата опозициска партија, Христијанско-демократската унија (ЦДУ) Фридрих Мерц, пишува германската новинска агенција ДПА.
Мерц за ДПА изјави дека тој и лидерот на баварската Христијанско социјална унија (ЦСУ), Маркус Зедер се сложни дека актуелната влада треба да се распушти што е можно порано.
ЦДУ и ЦСУ се традиционални партнери и претставуваат најголема опозициска група во Бундестагот.
Ако коалицијата на социјалдемократите, зелените и либералите се распадне, предвремени избори може да се одржат на 9 јуни, истовремено со гласањето за Европскиот парламент.
Меѓутоа, патот до предвремените избори е комплициран: покрај останатото, канцеларот Олаф Шолц во парламентот мора да бара да се гласа за доверба на владата која ја води и тоа гласање да го изгуби. За сега тоа не може да се очекува.
Мерц сугерира дека излезноста може да биде висока поради двата изборни процеса во еден ден.
Имено, на европските избори во Германија се гледа внимателно. Сега се стравува дека во 2024 година крајно десничарската партија Алтернатива за Германија ќе освои добар резултат, што може да се спречи со висока излезност на изборите, или барем така некои се надеваат.
Мерц е резервиран околу залагањето на Зедер после изборите да се направи т.н. голема коалиција, односно сојуз меѓу демохристијаните и социјалдемократите, како што тоа веќе се случувало.
Прашањето е, според зборовите на Мерц, дали е тоа воопшто математички можно во случај кога СПД е толку маргинализирана.
„И да бидам искрен – немам најмногу симпатија за тоа“, изјави лидерот на ЦДУ, додавајќи дека СПД во анкетите на јавното мислење има околу 14 отсто поддршка од гласачите.
„Со таква партија веќе не може да се прави голема коалиција“, заклучи Мерц.
Меѓутоа, тој нагласи дека демохристијаните на избори секако нема да одат со ветувања за тоа со кого ќе влезат во коалиција.
Сојузот меѓу ЦДУ и ЦСУ во моментов на анкетите има поддршка меѓу 31 и 34 отсто од гласачите.
