Денеска, во Брдо кај Крањ, во Република Словенија, се одржа неформален министерски состанок на министрите за внатрешни работи на Грција, Македонија, Србија и на Словенија, посветен на актуелната мигрантска криза, соопшти Министерството за внатрешни работи (МВР).
Како шеф на делегацијата на македонското МВР, на неформалната средба учествувал заменик-министерот Митко Чавков, кој бил придружуван од државниот секретар, Анастасија Илиеска, и помошник-директорот на одделот за гранични работи и миграции, Маринко Кочовски.
„На состанокот на кој свое излагање имаше и заменик-министерот Чавков, покрај презентирањето на актуелните состојби со мигрантите во секоја од земјите пооделно, фoкусот беше ставен на понатамошното продлабочување на оперативната соработка меѓу земјите на трасата на миграцискиот бран, како и околу активностите што треба да се преземат на тој план“, стои во соопштението на МВР за средбата.