Меѓународниот ден на студентите не се одбележува во универзитетскиот град Штип.
Според претседателот на Студентскиот парламент, Горан Стаменков, причината за ова е затоа што поголемиот дел од раководството на организацијата сè уште е во странство преку програмите за размена.
Оние студенти што денеска сакаа да зборуваат јавно, се пожалија на студентскиот стандард, побараа поголема отчетност во трошењето на нивните пари и поголема активност на Студентскиот парламент. Побараа и изградба на студентски дом, ветување старо колку што постои и универзитетот.
Велат дека плаќаат многу, а добиваат лоши соби по приватните куќи, како и дека Штип е студентски град, ама без современ студентски дом.
– Секој семестар плаќаме за Студентски парламент, а не ни знаеме што прават, кои се и каде одат нашите пари. Морам да патувам секој ден до Виница бидејќи така трошокот ми е помал отколку да плаќам по 50 евра за кревет – се жалат.
Засега има само одредена локација за изградба на студентски кампус во Штип. Последната најава од премиерот Никола Груевски е дека Владата планира изградба на три нови студентски дома, но ниту еден од тие три не е во Штип.
Што се однесува до Студентскиот парламент, актуелниот претседател, кому му е истечен мандатот, заработи кривична пријава од полицијата поради сомневање дека ги проневерил студентските пари. Надежите се свртени кон новото раководство, кое треба да се избира во јануари следната година.