Белгиската полиција спроведе рации во центарот на Брисел и уапси две лица поврзани со минатомесечните терористички напади во Париз, соопшти канцеларијата на белгиското државно обвинителство.
Во рацијата, која се одвивала доцна синоќа и траела пет часа, во близина на самиот центар на Брисел, учествувале специјалци и силите на федералната полиција.
– Двајцата мажи се доведени на сослушување – рече портпаролот на државниот обвинител, Ерик ван дер Сипт, кој не сакал да изнесе повеќе детали, но потврди дека не станува збор за бегалецот Салах Абдеслам, кој е еден од најбараните луѓе во Европа поради својата улога во нападите во Париз од 13 ноември, во кои загинаа 130 лица.
Белгиската полиција и понатаму трага по Абдеслам, 26-годишник по потекло од Брисел, за кој се сомнева дека играл клучна улога во париските напади и се верува дека еден ден по масакрот во главниот град на Франција се вратил во Брисел.
