Министерот за финансии Фатмир Бесими денеска потврди оти владата нема намера да ја задржи постојната даночна стапка на ДДВ од 10 отсто на сметките за потрошена струја за домаќинствата и малите потрошувачи. Ова значи дека од утре ДДВ-то ќе порасне од 10 на 18 отсто.
Бесими вели дека порастот на стапката на ДДВ нема да влијае кај најголемиот дел од потрошувачите, односно оние кои трошат помалку струја, ќе имаат пониски сметки, земајќи ги во предвид различните блок-тарифи.
„Всушност, ако се гледа нето-ефектот, нема да биде ДДВ од 10 на 18% туку во разни групи ќе биде пониска. Па дури, може и да нема раст на цената воопшто“, изјави министерот за финансии Фатмир Бесими.
Тој објасни дека намалувањето на ДДВ-то било направено како фаза во справувањето со енергетската криза со негово намалување од 18 на 5 отсто. Потоа, овој данок на сметките на струја се зголеми на 10 отсто, а враќањето на првичните 18 отсто ДДВ било пролонгирано, но само до јуни годинава.
Претседателот на Регулаторната комисија за енергетика и водни услуги Марко Бислимовски изминативе денови појасни дека враќањето на ДДВ на струјата од 10 на 18 отсто би значело зголемување за 2,5 отсто на крајната сметка на домаќинствата со просечна потрошувачка на струја во месецот.
Самите домаќинства и мали потрошувачи се поделени во четири блока, според обемот на потрошувачка на електрична енергија. Па така, Бислимовски пред неколку дена објасни дека вкупната цена на електрична енергија во прв блок со вкалкулирана енергија и мрежарина се намалува за 7 отсто, додека цената во втор блок се намалува за 4 отсто. Наспроти ова, цената на електрична енергија во трет блок ќе се зголеми за 2,5 отсто, а во четвртиот блок кои се и најголеми потрошувачи на струја ќе плаќаат од 1 јули и повисоки сметки за 2,4 отсто.
