Претседателот на Демократската унија за интеграција (ДУИ), Али Ахмети, денеска во седиштето на партијата во Тетово се сретна со амбасадорот на Холандија во Македонија, Воутер Пломп.
„Претседателот Ахмети и амбасадорот Пломп разговарале за политичката криза во земјава и за можностите за надминување на сериозната политичка ситуација. Ахмети повторил дека одлуката за помилување на политичарите на претседателот Ѓорге Иванов е неприфатлива и оти треба веднаш да биде повлечена. ДУИ останува посветена на спроведувањето на Договорот од Скопје и смета дека оваа ситуација може да се реши само преку волјата на граѓаните изразена на слободни, демократски и веродостојни избори. Земјата се соочува со тешки денови и тоа е одговорност на сите политички партии да се посветат за ставање крај на оваа криза, која влијае на секојдневниот живот на граѓаните и на евроатлантските аспирации на земјата“, заклучил Ахмети, стои во соопштението од ДУИ.