На седницата на Советот на општина Благоевград на 7 октомври, со 25 гласа „за“, ниту еден „против“ и четиримина воздржани – а 12 советници отсутни – е изгласана декларација и донесено решение (страници 3,4 и 5) со кое отворањето на Македонскиот културен клуб „Никола Вапцаров“ се смета за груба провокација и испад на „организации нелегитимни за бугарското право“.
Декларацијата, фактички, е препрека за отворањето на клубот, закажано за 30 октомври. Инаку, претходно, од стаклото беше одлепена почетната буква „М“ од натписот.
Во нејзиниот текст, чиј автор е советникот Кирил Илиев, се вели дека наводно македонската нација била вештачки создадена во 1934 година.
Наспроти сето законодавство на ЕУ, кое овозможува лични и национални права, со усвојувањето на декларацијата, советниците од Благоевград сметаат дека ваквиот центар претставува провокација, нелегитимна за бугарското право.
Советот на општина Благоевград смета дека со отворањето на клубот грубо се прекршува Договорот за добрососедство меѓу Бугарија и Северна Македонија и се погазуваат сите досега постигнати напори за подобрување на односите на Бугарија со Северна Македонија и се попречува нејзиниот пат кон членство во ЕУ.
