Генералниот секретар на НАТО, Јенс Столтенберг заедно со амбасадорите на сите земји-членки на Алијансата претпладнево со највисоки државни и воени почести се пречекани пред платото пред Владата, по што се очекува да имаат средба со премиерот Зоран Заев.
Со работниот дел на Северноатлантскиот совет со Комитетот за интеграција во НАТО и претставници на Влада што ќе се одржи потоа, ќе претседаваат Заев и Столтенберг.
Столтенберг и амбасадорите на Северноатлантскиот совет ќе бидат примени и од претседателот, Стево Пендаровски.
Генералниот секретар на НАТО пристигна вчера и присуствуваше на прием организиран од претседателот на Собранието, Талат Џафери.
– Наскоро, кога процесот на вашето пристапување ќе биде завршен, со нетрпение ќе ја пречекам Северна Македонија како триесеттата членка на нашата Алијанса. И да го видам вашето знаме развеано пред нашето седиште во Брисел, како и во нашите мисии и операции насекаде низ светот – рече Столтенберг.
