!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Владата одлучи да не се рекламира на приватните медиуми


Скопје, 22 август, 2017 - 19:56 (META) 

Владата на денешната седница ја усвои мерката од планот „3-6-9“ со која се стопираат владините реклами на комерцијалните радиодифузери и печатени медиуми, билборди, интернет портали (со исклучок на социјалните медиуми) и пренесување на комуникацијата со граѓаните преку јавниот радиодифузен сервис.

Оваа мерка, како што стои во соопштението од владината прес-служба, се однесува на сите органи на државната управа, а истата се препорачува и на институциите кои немаат статус на органи на државната управа, како и на единиците на локалната самоуправа.

Премиерот и министрите ја разгледале и усвоиле информацијата за потпишување на билатерален договор со Европската Унија за ко-финансирање на големиот проект за изградба на експресен пат на делница клучка Дреново – Градско, како дел од кракот 10-д на патниот коридор 10“.

На седницата е  разгледана и усвоена информацијата за потребата од ратификација на Конвенцијата на Советот на Европа за спречување и борба против насилството врз жените и домашното насилство, а одлучено е и до Собранието да се достави предлог-законот за ратификација на Договорот од Париз, кој се однесува на глобалните климатски промени и емисиите на штетни гасови.

Премиерот и министрите го разгледа и годишниот извештај за работењето на Македонска банка за поддршка на развојот АД Скопје во 2016 година и препорача банката, во рок од 3 месеци, да изготви и да достави Стратегија за зголемување на капацитетите за финансирање на македонските компании, со поконкурентни цени и услуги, како и за подобрување на условите за осигурување на извозот на македонските производи.

На седницата е разгледан Ревизорскиот извештај за извршена ревизија на финансиски извештаи на Централниот регистар на Република Македонија и годишна сметка за 2016 година, а Владата и препорача новото раководство на Централниот регистар да ја преиспита правната основа за одлуката на Управниот одбор на претпријатието добивката од минатата година, да ја уплати на сметката на Акционерското друштво за изградба и стопанисување со станбен простор и со деловен простор. Според владата, ваквата одлука на Управниот одбор би му нанела штета на редовното работење на Централниот регистар.

 

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на Фондацијата „Отворено општество – Македонија“.


Поради Супер купот, препродавањето билети ќе биде кривично дело


Скопје, 28 јули, 2017 - 15:49 (META) 

Во Собранието по попладневната пауза експресно беше закажана и се одржа 10. седница, со единствена точка на дневен ред – донесување предлог-закон за изменување и за дополнување на Законот за кривична постапка во скратена постапка, со кој рекламирањето билети за препродажба и нивната препродажба ќе станат кривично дело.

Ваквата препродажба досега воопшто не беше опфатена со законите, рече Томислав Тунтев, координаторот на пратеничката група на СДСМ. Тој предлогот на четирите најголеми партии во Собранието, ВМРО-ДПМНЕ, СДСМ, ДУИ и Беса, го образложи со барањата на УЕФА за одржувањето на Супер купот, а со тој закон ќе се овозможи на Фудбалската федерација на Македонија да ги исполни барањата на Европската федерација.

Откако предлогот беше прифатен, претседателот на Собранието, Талат Џафери, побара матичната комисија и Законодавно-правна комисија да го известат кога ќе ја продолжат процедурата за измената на Кривичниот законик и потоа ја прекина седницата и прогласи дека Собранието ќе продолжи со работа на точката од петтата седница, но набргу даде пауза за да овозможи комисиите да се координираат.


СДСМ Аеродром и Општина Аеродром се расправаат за „бесплатното“ рекламирање


Скопје, 12 јули, 2017 - 16:09 (META) 

Со остра реакција за рекламирањето на Општина Аеродром во медиумите, на билборди и на автобуси на ЈСП „Скопје“ се огласи општинската организација на СДСМ во општина Аеродром, прашувајќи „зошто се трошат народни пари за рекламирање општина“ или, ако навистина рекламирањето е бесплатно, зошто и со што ги задолжила Општината медиумите и огласувачите да го даваат рекламниот простор бесплатно.

– Повеќе од еден месец гледаме реклами на ТВ, радио, на „Фејсбук“, автобуси, билборди, во кои Ивица Коневски се промовира себеси. Во период кога централната власт крати на трошоци за рекламирање, Коневски продолжува да фрла пари на скапи реклами, како што ВМРО-ДПМНЕ правеше повеќе од десет години. Коневски вели дека овие реклами се бесплатни. Тоа значи дека бесплатно ги снимаат, бесплатно ги пуштаат на ТВ, бесплатно ги лепат на автобуси, можеби дури и бесплатно ги објавува на „Фејсбук“. Ако е така, се поставува прашањето зошто толку фирми и медиуми бесплатно работат за Коневски и со што ги има задолжено? – праша на прес-конференција Златко Марин, претседател на општинската организација на СДСМ во Аеродром.

Општина Аеродром реагираше прашувајќи зошто на СДСМ му пречи Општината да се пофали со реализираното. Нагласи дека целото рекламирање е бесплатно, оти медиумите донирале, а рекламирањето на „Фејсбук“ на градоначалникот Ивица Коневски е од негов џеб.


Андреас Елснер е нов главен извршен директор на „Македонски телеком“


Скопје, 25 април, 2017 - 11:31 (META) 

Андреас Елснер стапува на позицијата главен извршен директор на „Македонски телеком“ од 1 мај 2017 година, информираат од компанијата. Тој доаѓа на местото на Андреас Маиерхофер, кој на 1 април беше назначен за главен извршен директор на „Т-мобиле“ во Полска.

„Елснер доаѓа во „Македонски телеком“ во 2014 година, на чело на секторот за управување со односи со корисници и корисничко искуство, а од 2015 година е главен оперативен директор за приватни корисници, каде имаше клучна улога во развојот и во реализацијата на стратегијата за конвергирани решенија и услуги“, се вели во соопштението на „Македонски телеком“.

Во неговата 16-годишна кариера работел на раководни позиции во телекомуникацискиот бизнис во Австрија, Србија, Бугарија и во Македонија.

Елснер е роден во Виена, каде и се школувал. Дипломирал маркетинг, рекламирање и продажба на Универзитетот за економија и деловна администрација.


Нема договор за медиумите, преговорите продолжуваат попладне


Скопје, 18 февруари, 2016 - 1:07 (META) 

По неколкучасовни преговори работните групи вчера не постигнаа договор за рефoрмите во медиумите.

Белгискиот олеснувач Питер Ванхауте на својот профил на „Твитер“ најави дека разговорите ќе продолжат денеска попладне.

Пред почетокот на вчерашната средба на работните групи во Клубот на пратеници, Ванхауте изјави дека ситуацијата никогаш не е безнадежна и дека ќе продолжат со преговорите со надеж дека ќе се постигне договор.

Најголем проблем во преговорите засега се составот на Агенцијата за медиуми и владиното рекламирање.


Селмани предупредува: Предлагаат легализирање на владините реклами!


Скопје, 17 февруари, 2016 - 13:49 (META) 

Претседателот на Здружението на новинари, Насер Селмани, и претседателката на Самостојниот синдикат на новинари и медиумски работници, Тамара Чаусидис, денеска пред Клубот на пратениците, каде што се одржуваат преговорите за медиумите, уште еднаш го потврдија ставот на здруженијата деека нема да прифатат каква било форма на владино рекламирање.

Селмани рече дека слушнале шпекулации дека во преговорите има предлог со кој се овозможува легализирање на владините реклами, но со можност тој понатаму да се повлече.

– Штетното влијание на овие реклами е големо. Тие придонесуваат за контролирани непрофесионални медиуми. Со пари на граѓаните се корумпираат медиумите – изјави Селмани.

Тој се обрати до белгискиот посредник, Питер Ванхауте, да не дозволи со негов потпис да се легитимира решение кое е лошо и кое покажува дека нешто во сферата на медимуте се менува, а, всушност, сè останува исто. Селмани вели дека тие не се против тоа институциите да ги помагаат медиумите, но не со владино рекламирање.

– Постојат модели за субвенционирање на медиумите. Ваков пример има во многу европски земји и ние сме подготвени со партиите и со владата да разговараме и да им ги образложиме овие модели – додаде Селмани.

Чаусидис рече дека преговорите за медиумите само ја покажале драматичноста на состојбата во медиумите. Таа рече дека на новинарите им е одземено новинарството, а на јавноста медиумите.

– Самиот факт дека преговорите за медиуми се закочени за рекламите, покажува каде лежи зајакот. Нив не ги интересира јавноста, јавниот интерес, ниту медиумите. Нив ги интересираат само парите. Ако се согласат сите за предлогот за легализирање на владините реклами, се легализира клиентелизам во кој медиумите се бизнис за продавање гласови. Ние сакаме заштита на јавниот интересе, фер конкуренција и еднакви шанси за сите медиуми. Сакаме силни, професионални и економски независни медиуми – рече Чаусидис.