Кајакарење по бетонска река за подигнување на свеста за заштита на реките


Скопје, 14 септември, 2018 - 12:20 (META) 

Активистите утрово кајакареа по бетонската река пред Владата за да ја подигнат свеста кај јавноста за значењето на недопрената природа и прекрасните речни долини и кањони на Балканот.

Еко-свест заедно со ФРОНТ 21/42 покренаа петиција за стопирање на изградбата на хидроенергетски проекти во заштитените подрачја низ Македонија која се уште е отворена за потпишување.

„Во последните три дена Македонија беше дел од кампањата „Balkan Rivers Tour“, односно „Кајакарeње по балканските реки“. Со турнејата, тимот на „Balkan Rivers Tour“ дава поддршка на локални иницијативи што имаат заедничка цел – да ги заштитат последните слободни реки во Европа. Турнејата вклучува кајакарење по 23 реки низ 6 држави во 39 денови, почнувајќи од Тепелене, Албанија па се до Љубљана, Словенија, вклучувајќи ја и реката Радика во Националниот парк Маврово.

Екологистите велат дека „во Македонија, речиси сите реки се под големи директни и индиректни антропогени притисоци, во најголем дел од акумулации изградени на нив.“

„Планирани се повеќе од 400 хидроенергетски проекти само во нашата земја. Половина од нив во недопрена природа во најживописните речни долини. Пресушувањето на овие реки и уништувањето на нивното речно корито значи уништување на ретки и ендемични видови флора и фауна кои се дел од пошироки екосистеми дел од кои е и човекот. ООН уште во 2004 предупреди дека до 2025, 1.800 милиони луѓе ќе живеат во земји со недостиг на вода за пиење. Пресушувањето на реките ги доведува во опасност изворите на питка вода за жителите на многу локации во Македонија“, се вели во соопштението на „Еко-свест“.


Нивото на Охридско и Дојранско Езеро над дозволениот максимум


Скопје, 11 јуни, 2018 - 11:28 (META) 

Водостоите на поголем дел од реките во Македонија, се на над просечно ниво за јуни, а кај езерата над дозволениот максимум се Охридското Езеро со 11 саниметри и Дојранското Езеро со девет сантиметри, информираат од УХМР.

„Денешните хидролошки мерења покажуваат дека под просекот за јуни се водостоите на Црна Река со 37 саниметри, Крива Река каде двојно е пониско нивото и Сатеска Река со 10 сантиметри пониско ниво од просекот. На исто ниво како јунскиот просек е водостојот на Брегалница“, се вели во соопштението на УХМР.


Нивоата на природните езера повисоки од вообичаено


Скопје, 4 јуни, 2018 - 12:40 (META) 

Водостоите на трите природни езера и на речиси сите реки во земјава се повисоки од повеќегодишниот просек за јуни, покажуваат последните мерења од Управата за хидрометеоролошки работи (УХМР).

Исклучок се Крива Река на мерното место кај Крива Паланка, Брегалница кај Берово, Црна Река кај Новаци и Сатеска кај Ботун.

Нивото на Охридското Езеро е за 24 сантиметри повисоко од просечното за овој месец и е на 71 сантиметар над нултата кота.


ЕЛЕМ: Струја произведуваме колку што е моќноста на хидроелектраните


Скопје, 19 април, 2018 - 15:35 (META) 

ЕЛЕМ може да произведува електрична енергија преку хидроелектраните толку колку што е нивната моќност, се вели во реакцијата на компанијата, на обвинувањата на ВМРО-ДПМНЕ дека се загубени половина милион евра поради ненавремено производство на струја на ХЕЦ Глобочица и ХЕЦ Шпилје.

Во соопштението се додава дека „во години на големи дотеци, како што е оваа, производствените капацитети на ЕЛЕМ технички не се во можност да ја прифатат целата вода.“

„Два и пол месеци електраните Глобочица и Шпилје работат со максимален капацитет и се произведува електрична енергија според максималната инсталирана моќност на овие  капацитети. Сакаме, исто така, да појасниме дека претпразнење на акумулациите во есенскиот период немаше потреба да се прави, затоа што претходното раководство на компанијата ги остави акумулациите речиси празни и од тие причини дополнително претпразнење не беше потребно да се направи“, се вели во соопштението.

Од ЕЛЕМ појаснуваат дека не се единствениот корисник на водните ресурси каде што има инсталирано хидроенергетски капацитети.

„Согласно со тоа, ЕЛЕМ може да ги користи дотоците во овие водни ресурси согласно со Дозволите за користење на вода, кои пропишуваат услови за користење“, додаваат од ЕЛЕМ.


Охридското езеро 26 сантиметри над дозволениот водостој


Охрид, 4 април, 2018 - 10:43 (META) 

Нивото на Охридското езеро и денеска е 26 сантиметри над дозволениот максимален водостој.
Зголемени се нивоата и на реките низ државата, освен на Крива кај Крива Паланка и на Црна кај Новаци.

Нивото на Дојранското Езеро е три сантиметри под договорениот максимален водостој.


Водостоите на реките двојно повисоки за просекот во март


Скопје, 30 март, 2018 - 11:10 (META) 

Водостоите на сите реки се зголемени, а двојно повисоки од денешниот просек за март се нивоата на Треска кај Македонски Брод и Сатеска кај Ботун.

Според информациите на УХМР, пониски нивоа на водостоите има на Брегалница и Црна Река. Зголемувања на нивоата има и на Охридското, Преспанското и Дојранското Езеро.

УХМР за викендов најавува врнежи од дожд и топење на снежната покривка што дополнително ќе ги зголеми водостоите.


Нивото на Охридско Езеро се зголемува брзо, поради врнежите и топењето на снегот


Охрид, 15 март, 2018 - 12:54 (META) 

Поради брзото топење на снегот, интензивните врнежи на дожд и високите температури, екипите на ЕЛЕМ се на терен, и го следат брзиот пораст на нивото на Охридско Езеро, информираше директорот на оваа институција, Драги Миноски.

Тој додаде дека се преземаат потребните мерки во случај да продолжат ваквите временски прилики.

– Работиме максимално за да го оптимизираме нашето производство, имајќи предвид дека и нашите електрани во изминативе два месеци работат на максимално ниво. Ја употребуваме водата и правиме напори за да ја задржиме, но притоа да не направиме штета на Охрид и Струга, а исто така да не направиме штета ни по течението на реката Дрим – рече Миноски.

Тој објасни дека се контактира и со надлежните органи во соседна Албанија, се со цел да се контролира ситуацијата низ целиот Дримски басен.

Градоначалникот на Охрид, Јован Стојаноски изјави дека се следи состојбата на реките и каналите кои се влеваат во езерото.

– За жал, поради нераспишана тендерска постапка лани, коритата на реките и каналите не беа исчистени. Но ние исчистивме делови на најкритичните места, а целосно чистење ќе направиме по смирување на водотеците – рече Стојаноски.


Се намалува водостојот на реките, но е повисок од просекот за март


Скопје, 9 март, 2018 - 9:55 (META) 

Водостојот на Вардар денеска е понизок од вчера, но се уште е над просекот за март, покажуваат најновите хидролошки мерења.

Кај Јегуновце и кај Велес денеска нивото на Вардар е за 20 сантиметри пониско од вчера, кај Зајчев Рид е за четири сантиметри пониско. На исто ниво како вчера е водостојот на Вардар кај Демир Капија.

За 17 сантиметри е намалено и нивото на Треска кај Македонски Брод, а пониски во однос на вчера се и водостоите на скоро сите реки во државата. Исклучок се Брегалница, Крива Река и Црн Дрим кај кои е забележано минимално зголемување на водостоите.


УХМР: Вардар излеан локално, внимателно движење покрај реките


Скопје, 7 март, 2018 - 16:45 (META) 

Водостоите на реките се зголемени, а поради променливото време и честите промени на температурата, топењето на снегот продолжува со променлив интензитет, информираат од Управата за хидрометеоролошки работи (УХМР).

Од таму додаваат дека во горните текови на реките, се очекуваат постепени намалувања и стагнација, а низводно по теченијата, зголемување на водостојот.

– Предупредуваме на внимателно движење покрај реките и суводолиците. Треба со внимателност да се пристапува на местата каде нема насипи и каде речните брегови се ниски и без заштита. Ова се однесува на течението низводно од Скопје и Таорската клисура, низводно од Велес и Демир Капија и Гевгелиско-валандовскиот крај. На хидролошките станици Велес и Демир Капија веќе има одредени покачувања – велат од УХМР.

Во делови од горните текови на Вардар, Треска и Црна се уште постојат локални излевања и поплавени површини. Има и високи водостои на Пчиња, Сатеска и Бабуна.


УХМР: Можно зголемување на водостојот на реките во западните и јужните делови


Скопје, 13 февруари, 2018 - 17:32 (META) 

Управата за хидрометеоролошки работи (УХМР) попладнево соопшти дека по најавите за нови врнежи од дожд и снег и постудено време можно е извесно зголемување на водостоите на реките особено во западните и јужните делови, но не се очекува излевање.

Зголемување на нивоата се очекува на реките Треска, Црна Река и Голема река во околината на Ресен, како и на водотеците кои допаѓаат од Кожуф и реките во Гевгелиско-валандовска котлина.

Од УХМР велат дека иако не се очекуваат поплавувања на реките, сепак можни се високи водостои во овие сливни подрачја поради што се предупредува на внимателно движење покрај реките и суводолиците.

Во текот на денешниот ден и ноќта се најавуваат врнежи од дожд и снег кои, според прогнозата, на некои места ќе бидат пообилни така што локално се предвидува да наврнат и над 30 литри на квадратен метар. Се очекува да преовладува доста студено време поради што на повисоките места и на некои пониски, врнежите ќе бидат од снег.