!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

ВМРО-ДПМНЕ: Довербата кон граѓаните ја црпи од легитимно добиените избори


Скопје, 21 мај, 2017 - 10:03 (META) 

ВМРО-ДПМНЕ е одговорна партија која се грижи за своите граѓани и која довербата кон граѓаните ја црпи од легитимно добиените избори и како таква резултира со многубројни мега-проекти кои ги ветивме и веќе се реализираат, стои во редовното утринско соопштение на опозициската ВМРО-ДПМНЕ.

„Додека ВМРО-ДПМНЕ реализираше проекти за добробитот на граѓаните, Зоран Заев единствено ги следеше стапките и наредбите на своите ментори. Единствената цел на Зоран Заев изминатиов период е разнебитување на државата и поткопување на уставниот поредок“, се вели во соопштението.

Од партијата истакнуваат дека понатака ќе остане во функција на граѓаните, штитејќи ги нивните национални, граѓански и локални интереси.

„Разликите помеѓу посветеното работење на ВМРО-ДПМНЕ и анти-државното делување на СДС се дијаметрални и евидентни. Затоа СДС и Зоран Заев на наредните избори ќе доживеат катастрофален пораз“, велат од партијата“, се вели во соопштението.


УСАИД финансира 27 проекти за развој на економијата и на демократијата во Македонија


Штип, 16 мај, 2017 - 16:27 (META) 

Американската развојна агенција УСАИД во Македонија во моментот финансира вкупно 27 проекти, посветени на економскиот развој, демократијата и на развојот на општеството. Како и во изминатите 25 години, колку што УСАИД работи во Македонија, проектите се реализираат во блиска соработка со приватниот сектор, владата и со граѓанските организации.

Ова денеска во Штип, пред присутните во Американското катче, го објаснуваше Едвард Гонзалес, директор за генерален развој во УСАИД Македонија.

– УСАИД има прецизна цел – да ги поддржи развојните цели на Македонија. Едно од клучните нешта, за кое сите политичките партии изјавуваат дека се посветени, е приближувањето на Македонија кон Европската Унија. УСАИД е тука за да ја поддржи Македонија во сите тие напори да стане членка на ЕУ – рече Гонзалес.

Тој пред членовите на Американското катче објаснуваше што работи УСАИД во Македонија и информираше за актуелните и за поранешните проекти финансирани со американски пари.

Конкретно во Штип, УСАИД поддржува проекти што се посветени на работа со младите. Еден од нив е „Ангажирање на младите и општеството во различни проекти“, кој има цел да создаде врска меѓу граѓаните и локалната власт.


Експертите на УНЕСКО ја почнаа контролата на проектите во Охрид


Охрид, 11 април, 2017 - 12:50 (META) 

Група експерти на УНЕСКО од денеска се во Охрид каде што вршат увид на повеќе проекти што се во тек или кои се планирани да се реализираат.

Експертите на УНЕСКО најпрво го посетиле Националниот парк Галичица, каде разговарале со раководството на јавната установа, но и со претставници на владата. Неофицијално, во НП Галичица се врши увид во однос на два проекти планирани за реализација: експресен пат до Свети Наум и зимски ски-центар на Галичица.

За утре е планирана посета на комплексот во изградба на Универзитет „Св. Климент Охридски“ на Плаошник.

Последниот надзор на УНЕСКО беше пред неколку години, кога тие вршеа детален увид на Плаошник, по што констатираа дека проектите не ги нарушуваат стандардите на УНЕСКО .

На крајот од престојот, експертите треба да се сретнат со стручните лица и со раководството на Завод и музеј во Охрид, со претставници на локалната самоуправа, но и со невладините еколошки асоцијации.

Претходно, Комитетот за светско наследство на УНЕСКО на 40. седница во Истанбул изрази сериозна загриженост за иднината на регионот на Охрид, поради бројните инфраструктурни проекти кои беа предложени, што потврдува дека тие најверојатно би предивикале значителни потенцијални влијанија врз исклучителната универзална вредност на регионот на Охрид.


Општините Новаци и Алмопија ќе го развиваат туризмот со пари од ЕУ


Скопје, 14 март, 2017 - 11:49 (META) 

Завршната конференција на проектот „Жива историја – живо наследство“ ќе биде организирана во општинската сала на Општина Новаци, утре во 12 часот.

Проектот, кој чини 293.036 евра, е финансиран од Европската Унија во рамките на Програмата за прекугранична соработка помеѓу Македонија и Грција.

Целта на овој проект е да се зајакне соработката помеѓу општината Новаци и грчката општина Алмопија, за да се промовираат и да се заштитат природното и културното наследство на оваа прекуграничната област.

За таа цел беше формирано стратешко партнерство меѓу двете општини.

Како резултат на проектот, беа направени три туристички патеки за велосипедизам, планинарење и за крстосување со теренски возила. Исто така била направена и мобилна апликација за убавините на Мариово и на Новаци, за да се олесни туризмот во оваа област.

На настанот ќе се обратат Јаромир Левичек од Делегацијата на Европската Унија, градоначалникот на општина Новаци, Лазар Котевски, и градоначалникот на општина Алмопија, Димитрос Бинос.


Јапонската влада додели грантови за шест проекти во висина од 368.626 евра


Скопје, 13 март, 2017 - 12:59 (META) 

Јапонската влада додели грантови од 368.626 евра за шест проекти во Македонија, во рамките на програмата „Грант-помош за поддршка на мали проекти“(ГГП), основана од Владата на Јапонија.

Тојоказу Кубота, в.д. амбасадор во Амбасадата на Јапонија во Скопје рече дека ова е најголемата сума во последните десет години што е издвоена за ГГП во Македонија за една година.

– Убедени сме дека сите институции совесно ќе ги искористат средствата од грантовите за исполнување на поставените цели на проектите. Амбасадата на Јапонија во Скопје е подготвена да им помогне во нивните напори, а лично со нетрпение очекувам да ги посетам локациите на завршените проекти – изјави Кубота.

Парите се наменети за рехабилитација на две училиушта, за механизација за превенција од поплави, за медицинска апаратура, за амбулантно и за противпожарно возило.

Оваа програма во Македонија се спроведува во 1996 година и досега се реализирани повеќе од 100 проекти низ целата земја, со вкупен износ од околу шест милиони евра.


Илијовски: Боемска улица која чини 710.000 евра е оштетена и е со најмногу возила


Скопје, 14 февруари, 2017 - 15:40 (META) 

Мрзеливиот Жерновски преуреди улица од 270 метри која чини неверојатни 710.000 евра. Секој еден метар од оваа втора Боемска улица чини 2.629 евра. Како што можете да видите, не се ова златни плочки, туку обичен бехатон, изјави на прес-конференција претседателот на Општинскиот комитет на ВМРО-ДПМНЕ Центар и советник во Општина Центар, Илија Илијовски.

Тој истакна дека „и за втората Боемска улица од општината рекоа дека ќе биде забранета за паркирање и ќе биде пешачка зона, но е една од најпрометните сообраќајни улици во Дебар Маало.“

– Притоа, може да се забележат и видни оштетувања. Демонтирани столбчиња, искршени држачи за велосипеди, разлабавени плочки. По само неколку месеци, Боемската улица на мрзливиот Жерновски, почна да го доживува својот инфраструктурен крах – изјави Илијовски.

Тој додаде дека истите пари, Жерновски можел да ги инвестира во градинки, училишта и други капитални проекти кои им се потребни на граѓаните на Општина Центар.

– Мрзливиот Жерновски го преспа целиот мандат. Единствено што сработи се двете боемски улици за себеуживање и скапите забави, тамбураши и диџеи – додаде Илијовски.


Две струшки училишта добија средства за проекти за меѓуетничка интеграција


Струга, 7 февруари, 2017 - 14:10 (META) 

Основните училишта „Браќа Миладиновци“ и „Гоце Делчев“ од Струга, по доставена програма, добија средства од Министерството за образование и наука за проекти од областа на мултикултурализмот, меѓуетничката интеграција и толеранцијата во образованието.

Заради зајакнување и поддршка на активностите што придонесуваат за развој и за унапредување на мултикултурализмот, меѓуетничката интеграција и толеранцијата во образованието, МОН направи измени во Законот за основно образование и во Законот за средно образование, со кои на сите училишта им овозможува со креативни програми во таа сфера на воспитно-образовниот процес, да аплицираат и да стекнат парични средства за нивна реализација.

Планираните активности треба да вклучуваат интеракција на етнички, односно јазично мешани групи учесници во балансирани групи учесници според етничката припадност, полот и возраста.


СДСМ: Охрид окован во мраз, а ВМРО-ДПМНЕ преповторува ветувања стари четири години


Охрид, 12 јануари, 2017 - 10:07 (META) 

Во услови кога сите магистрални и регионални патишта кон Охрид останаа непроодни и неисчистени од снегот, а власта секоја година, на три фирми им дава 1,5 милион евра народни пари, пратениците од ВМРО-ДПМНЕ од Охрид, без никаков срам, уште еднаш, лажејќи ги охриѓани, ги повторуваат ветувањата од 2013 и 2014 за нови проекти.

Со ваква реакција, се огласија од СДСМ, по повод вчерашната прес-конференција на ВМРО-ДПМНЕ на која партијата вети ново пристаниште и експресен пат Охрид – Пештани.

„Власта во заминување ја ветува изградбата на пристаниште по четврти пат. Ветувањето е исто, само локацијата се менува. И експресниот пат Охрид – Пештани се ветува три години, но неговата изградба никако не почнува. Никогаш нема да бидат реализирани затоа што имаат негативно влијание врз животната средина. Со таквите проекти сериозно се загрозува нашето природно наследство, Студенчишкото Блато и Галичица. Затоа меѓународните финансиски институции одбиваат да ги финансираат ваквите штетни проекти на корумпираната власт, а Охрид годинава ќе се најде на листата на загрозени подрачја што се под заштита на УНЕСКО“, возвратија со сопштение од општинската организација на СДСМ.

Оттаму побараа пратениците од ВМРО-ДПМНЕ од Охрид да ѝ објаснат на јавноста зошто цели четири години не е реализирана ниту една од ветените инвестиции и зошто Општата болница во Охрид е со блокирана сметка и во финансиска дупка која надминува 2,5 милиони евра.


Ахмети апелира до Албанците да не гласаат за помалите партии


Тетово, 4 декември, 2016 - 23:38 (META) 

Демократската унија за интеграција (ДУИ) работи на подобрување на животниот стандард и на создавање силни албански кадри, кои на правилен начин ја водат државата, истакна лидерот на ДУИ, Али Ахмети, на вечерашниот митинг на партијата во Теарце.

– Предизборната кампања ја почнав во Липковско. Лично се уверив во проектите што ги остварила ДУИ. Во Липково има амбуланта, порано немаше. Го посетив Никуштак и таму видов многу проекти, кои ги остварила ДУИ. Нашата партија работи и на создавање нови албански кадри, кои сега се функционери во повеќе ешалони од власта. Ние одиме напред, ние не сме ограничени. Ние постојано работиме во интерес на граѓаните – рече Ахмети.

Лидерот на ДУИ упати апел од Албанците и побара од нив својот глас да го дадат за ДУИ и да не гласаат за помалите партии, затоа што така само пропаѓа нивниот глас.

– Има многу албански партии. Јас немам ништо против тоа, но до нив неколкупати сум апелирал да се обединат и да ја победат ДУИ, а не вака необединети. Власта не може да биде вечна, но албанството останува, затоа треба да бидеме пообединети. Јас апелирам да гласате за ДУИ, албанскиот глас да се концентрира кон нашата партија, бидејќи само на тој начин ќе можеме да ги решаваме вашите проблеми – нагласи Ахмети.

Тој како заслуга на неговата партија ја посочи индустриската зона во Тетово, каде, според него, за многу кратко време ќе се вработат 2.000 луѓе, а за неколку години во зоната, како што рече, ќе работат повеќе од 10.000 лица.

– Само така ќе се спречи иселувањето на младите Албанци од Западна Македонија – порача Ахмети.


Ахмети: Без ДУИ нема да функционираат ниту владата, ниту законите


Куманово, 3 декември, 2016 - 23:29 (META) 

Демократската унија за интеграција е најлегитимната партија што ги претставува Албанците и која најмногу придонела за промена на нивната нова историја, нагласи лидерот на ДУИ, Али Ахмети, на вечерашниот митинг во Центарот за култура „Трајко Прокопиев“ во Куманово, каде партијата ја презентираше платформата „Заедно одлучуваме“.

Ахмети истакна дека очекува ДУИ да победи на изборите на 11 декември, бидејќи без оваа партија нема да функционираат ниту владата, ниту законите.

Тој најави реализација на повеќе проекти, кои треба да го подобрат животниот стандард на граѓаните, додавајќи дека во Западна Македонија веќе биле отворени 2.000 работни места, а во план е изградба на економска зона во Липково.

На митингот во Куманово, пред присутните граѓани, се обрати и носителот на листата на ДУИ во втората изборна единица, Ејуп Аљими, кој рече дека со досега реализираните и со планираните проекти ќе биде изградена иднина за секое албанско семејство.