Еден милион евра за проекти за 30 општини и за осумте плански региони   


Скопје, 12 јуни, 2018 - 15:28 (META) 

Министерот за локална самоуправа, Сухејл Фазлиу и постојаната претставничка на УНДП, Луиза Винтон, денеска го отворија форумот на кој се презентираа условите и критериумите за финансирање на проекти во планските региони и во општините, во рамките на  проектот „Подобрување на општинското управување”, финансиран од Европската унија, во вкупна вредност од 2,4 милиони евра.

– Во рамките на проектот што Министерството го имплементира со УНДП, се финансираат осум проекти во осумте плански региони, a во втората фаза ќе бидат финансирани проекти и во 30 општини, во вкупна вредност од еден милион евра. Денеска, со учество на сите присутни  ги договараме генералните услови за подготовка и избор на првите осум проекти. Целта на Министерството за локална самоуправа е функционални единици на локалната самоуправа и конкурентни плански региони. Преку подобро управување на локално ниво да обезбедиме подобар пристап до услугите и подобар квалитет на живеење за сите граѓани – рече Фазлиу.


Владата го прошири опсегот на функционери што треба да кажат колку трошат


Скопје, 18 април, 2018 - 9:37 (META) 

Вчера Владата донела одлука најдоцна до 20 јуни годинава директорите и замениците на директорите на самостојните органи на државната управа, на органите во состав на министерствата и на инспекцискиот совет, на своите веб – страници да ги објават податоците за нивите службени трошоци за периодот од 01.12.2014 до 31.05.2015 година и за периодот од 01.12.2017 до 31.05.2018 година.

Истото им се укажува да го сторат и директорите и замениците на директорите на јавните претпријатија, правните лица со јавни овластувања и акционерски друштва во државна сопственост.

Со тоа се проширува досегашниот опсег на функционери и именувани раководни органи што треба да покажат отчетност пред јавноста.

„Обврската за објава на службените трошења, на долг рок ќе обезбеди ефикасност во работењето на институциите, како и зголемена одговорност на власта која работи транспарентно и отчетно без злоупотреба на државните ресурси“, соопшти Владата.

Истовремено, биле разгледани и усвоиени Правилници за мерките од Планот за економски пораст на Владата – столб 3. Правилниците се однесуваат на следните 4 мерки: Финансиска поддршка на мали и средни претпријатија со тенденција на брз пораст („Газели“), посебна финансиска поддршка за микро претпријатија, финансиска поддршка на микро, мали и средни претпријатија за подобрување на иновативноста, како и зафинансиска поддршка за стручно усовршување и пракса за нововработени млади лица.

Во исто време, Владата ќе формира работна група за следење на реализацијата на мерките од столб 3 од Планот за економски пораст.

На предлог на премиерот е прифатена иницијативата да се формира Национално координативно тело за изедначување на правата на лицата со попреченост , кое ќе функционира во рамките на Владата. Обврската за формирање ваков орган произлегува од Меѓународната Конвенција на ОН за заштита на правата на лицата со попреченост, која Република Македонија ја има ратификувано во 2011 година.


„Метаморфозис“: Податоците за трошењата ќе бидат покорисни во машински читлив формат


Скопје, 27 март, 2018 - 16:15 (META) 

Фондацијата за интернет и општество „Метаморфозис“ ѝ препорачува на Владата на Република Македонија да ги објави во машински читлив формат податоците за трошоците на министерствата и другите институции од централната власт.

„Метаморфозис“, која е една од граѓанските организации што цврсто се залагаат за примена на принципите на доброто владеење, отчетност, транспарентност и отвореност, го поздравува потегот на Владата да ја воведе електронската алатка за прикажување на трошоците, но напоменува дека податоците што се презентираат преку неа, заради подобра анализа, треба да ги овозможи и во машински формат.

„Потсетуваме дека за целосно исполнување на принципите на отчетност, транспарентност и отвореност потребно е податоците да се објават на начин и во форма кој ќе овозможи нивна додатна анализа и користење од страна на сите заинтересирани страни, особено од страна на македонските даночни обврзници за чии пари всушност се однесуваат самите податоци“, порачуваат од „Метаморфозис“.


Владата ќе ги објави податоците за трошењата на функционерите во машински читлив формат


Скопје, 23 март, 2018 - 15:43 (META) 

Владата планира да ја објави целата дата-база на трошоците на носителите на јавни функции во машински читлив формат на нејзиниот веб-сајт, најави за „Мета“ портпаролот на Владата, Миле Бошњаковски.

– Концептот на „отворени податоци“ и е важен на оваа Влада и ќе работиме да отвораме податочни сетови создадени од институциите, кои би биле корисни за граѓаните – вели Бошњаковски, одговарајќи на прашањето од „Мета“ дали податоците од Алатката за отчетност за трошоците на функционерите ќе бидат објавени и во машински читлив формат.

Тоа ќе овозможи различни анализи со помош на софтвер, што податоците објавени на Алатката сега не го овозможуваат.

Овој дел од веб-страницата на Владата ги презентира трошоците преку визуализации, кои се подредени по еден урнек, и овозможуваат да се избере прегледување по категории трошоци, по функционер и по институција.


Владата вети и воведе „Отчетномер“


Скопје, 21 март, 2018 - 17:03 (META) 

Владата на Република Македонија на прес конференција на 21.03.2017 година претстави електронска алатка (што ние неофицијално ја нарековме Отчетномер), за „мерење“ на трошоците на министерствата и другите институции од централната власт, што го оценуваме како исполнето предизборно ветување и ветување наведено во програмата за работа, пишува Теофил Блажевски на „Вистиномер.мк“.

Ветување: (Владата) Ќе воведе принцип на т.н. „активна транспарентност“ на институциите, што подразбира објавување (без да им бидат побарани) на нивните програми (и предлог – програми), стратегии, мислења и студии, податоците за организацијата и трошоците на работењето, како и одлуките, актите и мерките со кои се влијае врз животот и работата на граѓаните и фирмите

[Извор: Влада на РМ – Програма за работата на Владата на РМ 2017-2020 г. стр.20, датум: 1 јуни 2017 година]

ОБРАЗЛОЖЕНИЕ:

Владејачката партија СДСМ, уште во предизборната програма во 2016 година, „Живот за сите во Македонија“, вети отчетност во однос на трошењето на јавните пари од страна на функционерите на власта доколку ја добијат и тоа на две нивоа на централната власт – преку Владата и преку Министерството за финансии:

Владата ќе работи исклучиво за потребите на граѓаните. Ќе биде целосно транспарентна во намената на парите на граѓаните, кон потребите на граѓаните. Функционерите нема повеќе да можат да се луксузираат за свои лични цели – се наведува во делот наречен „Ќе има контрола над власта и правда за сите!“ (стр.8)

Повеќе на темата прочитајте на „Вистиномер.мк“.


Улогата на дигиталните алатки за демократија во Македонија ќе биде сè поважна


Скопје, 25 јануари, 2018 - 16:17 (META) 

Со панел-дискусија денеска во ЕУ-инфоцентарот, институтот „Импакт“ ја презентираше публикацијата „Дигитални алатки за демократија во Македонија: Преглед и перспективи”, која опфаќа анализа на четири постојни алатки за собирање информации од јавноста, како и две алатки кои ги советуваат гласачите.

Амбасадорот Ваутер Пломп, кој го отвори настанот поддржан од Холандската амбасада, ја истакна улогата на овие алатки како дополнување на демократските процеси, но и нивната сè поголема потреба при носењето на информирани одлуки од страна на граѓаните.

На самата панел дискусија, освен двете дигитални алатки на „Импакт“ – „Изборен компас 2016“ и „Локален избор 2017“, беше презентирана платформата „Пријави корупција“ на „Транспаренси Интернешнл – Македонија“, а Министерството за информатичко општество и администрација ја презентираше состојбата и плановите за иднина на Единствениот национален регистар на прописи – ЕНЕР.

Беа презентирани и успешни светски примери на дигитални алатки, кои се од отворен тип, односно се слободни за преземање и модификација, со што слободно може да се преработат за користење во Македонија. Беше посочено и дека треба повеќе да се промовираат дигиталните алатки за поголем број граѓани да дознаат за нив, со што ќе може полесно да се врши граѓански притисок и контрола на властите во поглед на решавањето на проблемите.

Беше заклучено дека дигиталните алатки имаат свои недостатоци, но и големи неискористени потенцијали и дека нивната улога во развојот на демократијата ќе биде сè поголема. Како главни недостатоци се истакнаа последиците од дигиталниот и генерацискиот јаз како и проблемите на самоодржливост, односно фактот дека тие најчесто се финансирани од грантови и после нивното завршување веќе не се ажурираат.

Во контекст на е-демократија и дигитални алатки, треба да се напомене дека „Гласомер“ на „Метаморфозис“, реализиран во 2011 година е пионер на ова поле.


Почна вториот бран мерења на отчетноста на извршната, локалната и законодавната власт


Скопје, 28 декември, 2017 - 10:30 (META) 

Фондацијата за интернет и општество, „Метаморфозис“, заедно со други партнери од регионот го почна вториот бран на мерења преку индикатори на отвореност, отчетност и транспарентност на владите и државните институции во шест земји од регионот. Истражувањето е дел од проектот „Актион СЕЕ“ – одговорност, технологија и Мрежа на институционална отвореност во Југоисточна Европа.

Како што соопштија од „Метаморфозис“ деновиве биле испратени прашалници до Управниот суд, Судскиот совет, Врховниот суд, Јавното обвинителство, министерствата, Владата, Бирото за јавни набавки, како и до низа извршни агенции и органи за мониторирање на отвореноста и отчетноста на институциите.

Според резултатите од првиот бран мерења, спроведено во 2016 година, општините во Македонија исполнуваат 34 отсто од индексот на отвореност, Јавното обвинителство 51%, додека судовите исполнуваат 52% од индикаторите за отвореност. Судскиот совет е незначително подобар и исполнува 58% од индикаторите за отвореност.

Индексот на отвореност е композитен показател, којшто го определува степенот на отвореност на владите од Западен Балкан кон граѓаните и општеството и е создаден со цел да дефинира до кој степен граѓаните од Западен Балкан добиваат погодни и разбирливи информации од институциите.

Крајната цел на проектот е зголемување на вклученоста на граѓанското општество и медиумските организации во креирањето на јавното мислење, креирањето политики и учество во механизмите за донесување одлуки, како и зголемување на капацитетите на граѓанското општество да адресира чувствителни прашања.


Владата се пофали дека објавила документи што со закон е должна да ги објави


Скопје, 27 ноември, 2017 - 15:26 (META) 

Владата на својата официјална интернет-страница денеска објави десетици документи и информации кои се однесуваат на работата на Генераниот секретаријат, кабинетот на премиерот Зоран Заев, вицепремиерот за економски прашања Кочо Анѓушев и на работата на уште неколку министри без ресор.

Од Владата дека велат дека ова е „во насока на зголемување на транспаретноста и на отчетноста“.

„На интернет-страницата на Владата првпат се достапни буџетите од минатата и од оваа година, ревизорски извештаи, планови за набавки, листа на вработени со официјални телефони и е-маил адреси, правилници за систематизација на работните места, правилници за организација, закони и подзаконски акти во надлежност на институциите, листа на информации од јавен карактер, органограм за внатрешната организација, како и календар на настани“,  пишуваат од Владата.

Документите се достапни во категоријата „Информации од јавен карактер“, на веб-страницата, каде стои дека Владата на 34. седница „разгледа и усвои информација што се однесува на листа на акти и материјали коишто министерствата согласно закон се обврзани да ги објават на своите веб-страници“.


Доделени грантови на 18 организации од шест земји во рамки на проектот „Актион СЕЕ“


Скопје, 15 септември, 2017 - 16:00 (META) 

Вкупно 18 граѓански организации од шест држави добија грантови за имплементација на проекти во времетраење до шест месеци. Организациите од Македонија, Србија, Албанија, Косово, Црна Гора и од Босна и Херцеговина, во наредниот период ќе адресираат горливи прашања од локален и од национален карактер за да се унапредат доброто владеење и владеењето на правото.

Грантовите се наменети за локални граѓански организации, а се доделени во рамки на проектот „ACTION SEE – Одговорност, технологија и мрежа на институционална отвореност во Југоисточна Европа“, спроведуван од Фондацијата за интернет и општество „Метаморфозис“ во партнерство со „Вестминстер фондација за демократија“ од Велика Британија, Центар за истражувања, транспарентност и отчетност (ЦРТА) од Србија, Граѓанска асоцијација „Зошто не?“ од Босна и Херцеговина, Центар за демократска транзиција (ЦДТ) од Црна Гора, „Опен дата – Косово“ и Движењето „Доста!“ од Албанија, а со финансиска поддршка од Европската Унија.

Добитници на грантовите во Македонија се Здружението за промоција и развој на инклузивно општество „Инклузива“, Институт за стратешки истражувања и едукација (ИСИЕ), „Профицио“ и „Заеднички вредности“.


Димитров ја укина тајноста на податоците за службените патувања на дипломатите


Скопје, 15 јуни, 2017 - 20:46 (META) 

Министерот за надворешни работи, Никола Димитров, донел решение со кое се укинува тајноста на сите документи што се однесуваат на службените патувања на шефот на дипломатијата и на сите вработени во МНР, соопшти денеска МНР.

Ова значи дека документите поврзани со службени патувања на вработените во Министерството за надворешни работи повторно стануваат информации од јавен карактер, односно медиумите и јавноста ќе имаат пристап до нив.

„Министерството за надворешни работи на Република Македонија ги информира медиумите и пошироката македонска јавност дека во духот на транспарентноста и на отчетноста пред сите граѓани, со решение на министерот за надворешни работи донесено на 12 јуни 2017 година, се укинува претходното решение на заменик-министерот за надворешни работи од 14 февруари 2017 година за класификација на сите документи што се однесуваат на службени патувања на министерот и на сите вработени во Министерството, како и на сите службени патувања на лица кои се во делегација или во придружба на истата“, стои во соопштението.

Од МНР велат дека решението на Димитров е „производ на посветената заложба на Министерството за целосна транспарентност пред граѓаните и пошироката македонска јавност и за отчетност во работата на Министерството и начинот на трошење на парите на даночните обврзници, без притоа да ја загрози сензитивноста или безбедноста на својата работа“.