Дачиќ: Србија нема да го признае Косово поради „европскиот морков“


Белград, 26 октомври, 2018 - 16:43 (META) 

Реагирајќи на изјавата на германскиот пратеник Петер Бајер дека „Србија не може да биде дел од ЕУ додека не ја признае ,де јуре‘ независноста на Косово“, српскиот министер за надворешни работи Ивица Дачиќ денеска порача дека „Србија нема да ги згази својот Устав и образ признавајќи ја лажната држава Косово поради некаков европски морков“.

– Изјавата на германскиот пратеник секако треба да се сфати сериозно бидејќи тој е функционер на ЦДУ, партијата на германската канцеларка Ангела Меркел, но зошто тогаш треба дијалог во Брисел, зошто треба исцрпувачки и многу фрустрирачки процес, ако однапред се знае крајот – вели Дачиќ.

Тој во изјавата за весникот „Вечерње новости“ потенцира дека дипломатска битка за Косово допрва претстои и дека сигналите од некои клучни западни држави, а пред се САД „кои досега цврсто стоеја на позицијата дека за нив независноста на Косово е завршена работа“ на Србија и даваат право да се бори „почитувајќи ја реалноста на терен и темелите на меѓународното право“.


Пендаровски: Референдумот е со иста историска тежина со оној за независноста


Битола, 3 септември, 2018 - 12:57 (META) 

Референдумот на 30 септември е со идентична важност и еднаква историска тежина како референдумот за независност од 8 септември 1991 година, рече националниот координатор за НАТО, Стево Пендаровски на граѓанската трибина во Битола, која е дел од караванот на коалицијата „Заедно за европска Македонија“.

На средбите со граѓаните беа претставени придобивките од членството во НАТО и ЕУ, притоа осврнувајќи се особено на економските бенефити кои ќе ги има Македонија како дел од најголемиот пазар во Европа од 500 милиони жители.

„Ако тогаш гласавме масовно над 90 отсто да имаме држава, сега на овој 30 ти септември ќе излеземе, ќе гласаме ЗА интеграција во ЕУ и НАТО и за навек да ја утврдиме македонската државност во целиот свет. Да ја завршиме нашата работа, да влеземе во најмоќната безбедносна коалиција НАТО, да ги отвориме вратите за друштвото на најбогатите држави кои се дел од ЕУ,“ порача Пендаровски.


Отфрлена кривичната пријава против Заев и Димитров за загрозување на независноста


Скопје, 27 јули, 2018 - 16:09 (META) 

Основното јавно обвинителство ја отфрли кривичната пријава која ја поднесе Граѓанската иницијатива за здраво, достоинствено и возвишено живеење „Преродба“ – Движење на носителите и бранителите на државниот суверенитет „Македонска преродба“ против премиерот Зоран Заев и министерот за надворешни работи Никола Димитров за загрозување на независноста бидејќи пријавеното дело не било кривично дело за кое се гони по службена должност.

Како што информираат од ОЈО, Движењето ја поднело пријавата против Заев и Димитров поради потпишување на спогодбата со Грција со која според нив биле „разнишани темелите постоењето на Република Македонија, како и со која се врши разнебитување и културен геноцид врз Македонците и Република Македонија“.

Во образложението од ОЈО велат дека Заев и Димитров биле пријавени и за кривичното дело Злосторство против човечноста за кое треба да постапува Основното јавно обвинителство за гонење на организиран криминал и корупција.

„Основното јавно обвинителство Скопје, по анализа на спомнатата Спогодба, тргнувајќи од Преамбулата во која се изнесени целите на актот и нејзините основни начела, оцени дека при склучување на Спогодбата договорните страни се повикале на начелата и целите на Повелбата на Обединетите нации, Завршниот документ од Хелсинки од 1975 година, релевантните акти на Организацијата за безбедност и соработка во Европа и вредностите и начелата на Советот на Европа. При тоа се воделе од духот и начелата на демократијата и се повикале на нивна обврска согласно Повелбата на Обединетите нации и меѓународното право, под каков било изговор и во било која форма, да не се мешаат во внатрешните работи и надлежности една на друга. Надлежниот јавен обвинител ценеше дека пријавените при потпишување на Спогодбата не биле ниту под влијание, ниту пак имале помош од државата кон која нашата земја се доведува во потчинетост или зависност, уште повеќе што по потпишувањето на наведената Спогодба следат и други правни инструменти – ратификација и референдум“, додаваат од Обвинителство.


Мадагаскар ја призна независноста на Косово, соопшти Пацоли на „Твитер“


Париз, 26 ноември, 2017 - 11:11 (META) 

Министерот за надворешни работи на Косово, Беџет Пацоли, изјави дека Мадагаскар ја признал независноста на Косово, на маргините на министерската конференција на Меѓународната организација на франкофонијата во Париз.

Пацоли информацијата ја објави на својот твитер-профил.

„Задоволство ми е да објавам дека Мадагаскар го призна Косово како независна и суверена држава“, напиша шефот на косовската дипломатија на „Твитер“.

Заменик-министерот за надворешни работи, Петрит Сељими, исто така „твитна“ дека Мадагаскар го признал Косово.

На истата конференција во Париз учествува и шефот на српската дипломатија, Ивица Дачиќ, кој изразил очекување дека „ќе продолжи процесот на повлекување на признавањата“, соопштило Министерството за надворешни работи на Србија, пренесува балканскиот сервис на „Радио Слободна Европа“.


Шпанското обвинителство бара притвор за претседателката на каталонскиот парламент


Мадрид, 9 ноември, 2017 - 20:27 (META) 

Шпанскиот државен обвинител побара од Врховниот суд на земјата да им одреди притвор на претседателката на каталонскиот парламент, Кармен Форкадељ и на тројца пратеници поради нивната улога во прогласувањето на независност на Каталонија, јавуваат шпанските медиуми.

Претседателката на каталонскиот парламент и петмина пратеници денеска дадоа исказ во судот во Мадрид. Тие се обвинети за бунт, поттикнување бунт и злоупотреба на јавни фондови.

Обвинителот побарал ослободување на двајца пратеници, но засега не е познато дали тоа е поврзано со одредени услови.


Шпанското обвинителство бара од судот да издаде европски налог за апсење на Пучдемон


Мадрид, 2 ноември, 2017 - 19:32 (META) 

Шпанското обвинителство денеска побарало од судот да издаде европски налог за апсење на разрешениот каталонски лидер, Карлес Пучдемон, и на уште четворица членови на неговата влада, откако не се појавија на сослушувањето во Мадрид, јавуваат светските медиуми.

Судот сè уште не донел одлука по барањето на обвинителството.

Пучдемон и 14 членови на каталонската влада беа разрешение на 27 октомври, откако еднострано прогласија независност на Каталонија.

Пучдемон од понеделникот оваа недела се наоѓа во Брисел, каде ангажираше адвокат. На прес-конфрененција завчера, тој изјави дека ќе се врати во Шпанија доколку добие гаранции од владата во Мадрид дека нема да биде гонет.

Судот во Мадрид денеска сослуша дел од членовите на разрешеното раководство на Каталонија.

Шпанското обвинителство побара притвор за каталонските лидери, додека трае истрагата за нивната улога во прогласувањето на независност на Каталонија.


Мадрид го блокираше прогласувањето независност на Каталонија


Мадрид, 31 октомври, 2017 - 15:21 (META) 

Уставниот суд на Шпанија на пленарна седница го блокираше прогласувањето на декларацијата за независност на Каталонија, јавува шпанскиот весник „Ел Мундо“.

Уставниот суд ги предупреди членовите на канцеларијата на постојаниот претставник на парламентот во Каталонија, меѓу кои и претседателката на парламентот на Каталонија, Кармен Форкадељ, да прекинат со иницијативи што вклучуваат спроведување на декларацијата, наведува весникот.

Освен до Форкадељ, предупредувањето е упатено и до поранешниот потпретседател на распуштениот парламент, Љуиза Гина, и до други каталонски претставници.


Нов ден неизвесност во Каталонија откако Мадрид ја презеде власта


Барселона, 30 октомври, 2017 - 11:22 (META) 

Шпанскиот регион Каталонија, кој во петокот еднострано прогласи независност, по што шпанската влада ги суспендираше сите регионални водачи, од кои прв е лидерот Карлес Пучдемон, денеска влегува во првиот работен ден по прогласувањето независност, кога се очекува мерките што Шпанија ги донесе во петокот да стапат на сила.

Судот во Мадрид денеска ќе ја добие сета потребна документација врз основа на која ќе одлучи дали ќе поднесе обвинение против лидерот на Каталонија, Карлес Пучдемон, и другите сепаратистички лидери. Водачите на полицијата во Каталонија беа сменети во петокот, а тогаш падна и наредба да се отстранат фотографиите на Пучдемон од канцелариите на администрацијата.

Речиси целото раководство на регионот, пак, во текот на викендот повикуваше на „демократско спротиставување“ на Мадрид.

„Не можеме да го признаеме државниот удар против Каталонија, ниту, пак, која било од антидемократските одлуки“, напиша заменик-лидерот Ориол Хункуерас во колумна за еден каталонски весник викендов.

Во Каталонија се во исчекување на шпанската реакција откако разрешените лица од централната власт и денеска седнаа на работните места.

Медиумите во Каталонија наведуваат дека каталонската влада смета дека не е распуштена и покрај тоа што шпанскиот премиер, Марјано Рахој, ја распушти со активирање на членот 155 од Уставот и свика избори за 21 декември. Тие напоменуваат дека во службениот весник ниту е објавена смената на владата, ниту, пак, Декларацијата за независност.

Вчера, пак, во Барселона, се собра толпа од околу 300.000 луѓе кои вееја знамиња на Шпанија и на ЕУ. Луѓето протестираа против прогласувањето независност на регионалниот каталонски парламент во петокот.


Протести во Барселона против независноста на Каталонија


Барселона, 29 октомври, 2017 - 12:26 (META) 

Во Барселона ќе има нови протести кои ќе бидат против прогласувањето независност на Каталонија од Шпанија. Каталонската цивилна асоцијација ги повика противниците за независностa да излезат попладне на улиците. Нивниот слоган е „Ние сме сите Каталонија. Здрав разум за коегзистенција“.

Според организаторите, целта на маршот е да се одбрани единството на Шпанија и да се отфрли „нападот без преседан, во историјата на демократијата“, пренесуваат светските медиуми.

Се очекува дека на протестите ќе учествуваат членовите на централната влада во Мадрид и припадниците на политичките партии кои се за единство на државата. Вчера, околу стотина лица прошетаа низ улиците на Барселона во знак на протест поради прогласување независност.

Шпанија ја презеде директната контрола над Каталонија и ја смени регионалната влада, откако во петокот каталонскиот парламент изгласа декларација за независност. Премиерот Маријано Рахој го распушти регионалниот парламент и распиша нови избори во Каталонија за 21 декември.


Хрватска: Шпанија треба да го реши проблемот со Каталонија во рамките на Уставот


Загреб, 28 октомври, 2017 - 17:40 (META) 

Хрватското министерство за надворешни и европски работи смета дека случувањата во Каталонија се внатрешно прашање на Шпанија.

Оттука, Хрватска се залага за демократско и мирно решавање на проблемот, во согласност со европските вредности.

Во соопштението на министерството, исто така, се наведува дека Хрватска не смета дека прогласувањето независност на Каталонија е во согласност со шпанскиот устав и верува дека најдобро решение е тоа кое се темели на дијалог, со полна почит кон владеење на правото и заштитата на правата на сите граѓани кои живеат во Каталонија.

Хрватскиот премиер Андреј Пленковиќ вчера изјави дека спорот помеѓу Мадрид и Каталонија треба да се реши во рамките на Уставот на Шпанија.