!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Пучдемон доби нов рок, треба да одлучи до четврток


Мадрид, 16 октомври, 2017 - 20:48 (META) 

Каталонскиот лидер Карлес Пучдемон, кој требаше денеска да се изјасни дали прогласил независност на Каталонија или не, има нов рок – четврток до 10 часот.

– Господинот Пучдемон има уште една шанса да почне да ја решава оваа ситуација, тој мора да одговори со „да“ или „не“ за тоа дали прогласил независност – изјави вицепремиерката на Шпанија, Сораја Саенс де Сантамарија.

Таа истакна дека Пучдемон не дал адекватен одговор во своето писмо на она што од него го барала шпанската влада и мора до четврток да каже дека не прогласил независност и да се врати на патот на почитување на законите на Шпанија.

Сантамарија додаде дека во спротивно, Каталонија ќе биде соочена со активирање на членот 155 од Уставот, кој ѝ овозможува на шпанската влада да преземе контрола над регионот.

Според неа, меѓусебниот дијалог треба да се одвива во согласност со законот, односно во шпанскиот парламент.


Рахој бара од каталонската влада да разјасни дали прогласила независност или не


Мадрид, 11 октомври, 2017 - 12:52 (META) 

Шпанскиот премиер Маријано Рахој денеска на прес-конференција соопшти дека ќе бара од каталонската влада да разјасни дали Каталонија прогласила независност или не.

Рахој рече дека се бара појаснување пред да биде преземена каква било акција, во согласност со членот 155 од уставот на Шпанија.

Портпаролот на каталонската влада, Жорди Турул, за „Радио Каталонија“ утрово изјавил дека доколку шпанската влада одлучи да интервенира во врска со регионалните автономни овластувања, тој потег ќе биде протолкуван како знак дека Мадрид не е подготвен за преговори и Каталонија ќе биде обврзана да тргне кон својата независност.

Претседателот на каталонската регионална влада, Карлес Пучдемон, доцна синоќа ја потпиша декларацијата за прогласување независност на Каталонија, но го суспендираше нејзиното стапување на сила за да остави простор за дијалог со Мадрид.


Заев: МРТ ќе биде независен медиум, со независен директор и со независни уредници


Скопје, 6 октомври, 2017 - 14:49 (META) 

Со парите што ќе се издвојуваат од буџетот на државата за „Македонската радио-телевизија“ (МРТВ), ќе се обезбеди независност на националниот сервис, порача лидерот на СДСМ и премиер, Зоран Заев, од вчерашниот партиски мининг во Тетово, во рамките на кампањата за локалните избори на 15 октомври.

Ова Заев го истакна зборувајќи за укинувањето на радиодифузната такса, со која досега се обезбедуваа и до 47 отсто од средствата за МРТВ.

– Од 80.000 до 100.000 сметки се блокираа месечно поради радиодифузната такса. Ја укинавме и радиодифузната такса и повеќе нема никому да му доаѓа сметка за радиодифузна такса и да му биде блокирана сметката! Плаќате даноци, од буџетот ќе ги издвоиме сите тие пари за „Македонската радио-телевизија“ и тие ќе бидат исплаќани секој почеток на месецот од први најдоцна до пернаесетти. МРТВ нема да зависи ниту од Драган Тевдовски, министерот за финансии, ниту од Зоран Заев, ниту од кој било што ќе дојде по нас. Ќе има независен медиум, со независен директор, со независни уредници поради тоа што од независноста на МРТВ, зависи и неависноста на другите медиумите, а ако имаме независни медиуми, ќе има совест во Македонија, ќе гледаат непристрасно и ниту на Заев, ниту на кој било друг ќе му падне на памет да краде повторно од државата – рече Заев.

Според предложеното законско решение, за радиодифузна дејност е предвидено да се издвојуваат 0,5 отсто од државниот буџет, односно околу 885 милиони денари или 14,4 милиони евра, од кои на МРТ ќе ѝ припаднат 10,7 милиони евра (остатокот оди во Македонската радиодифузија и во Агенцијата за аудио и аудиовизуелни медиумски услуги).

Здружението на новинарите на Македонија (ЗНМ), Независниот синдикат на новинари и медиумски работници (ССНМ) и Советот за етика во медиумите (СЕММ), бараат сумата за МРТ да биде 1 отсто од буџетот (околу 30 милиони евра), бидејќи, според нив, сè што е под оваа сума нема да гарантира независен, професионален и ефикасен национален сервис.

Инаку, од Министерството за информатичко општество и администрација во август годинава, на финална расправа беше испратен предлог-законот за измена на Законот за аудио и аудиовизуелни медиумски услуги, каде што процентот на буџетско финансирање за радиодифузијата беше 0,7 отсто. Но, наместо да се дискутира за таа верзија, сега се појави предлог-закон во кој процентот за финансирање на радиодифузијата е 0,5 отсто.

Со издвојување 0,5 отсто од државниот буџет, националниот сервис ќе има помалку пари на располагање од буџетите во изнинатите неколку години, кои беа од 18 до 23 милиони евра, пишуваше неодамна „Вистиномер“.

Обезбедувањето доволно средства за независно функционирање на МРТ е едно од клучните барања на Еврпската Унија и на европскиот експерт Рајнхард Прибе, во неговиот извештај од 2015 година, но и во најновниот, од јули годинава.

„Мора итно да се обезбедат соодветни средства за да се засили нејзината независност и за да се овозможи ефикасно работење и управување“, стои во извештајот на Прибе.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ – Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка од „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


Шпанскиот суд ја суспендира седницата на каталонскиот парламент за прогласување независност


Мадрид, 5 октомври, 2017 - 19:05 (META) 

Уставниот суд на Шпанија го суспендираше одржувањето на седницата на каталонскиот парламент, закажана за понеделник, на која требаше еднострано да биде прогласена независноста на Каталонија, јавуваат шпанските медиуми.

Според судот, таквиот потег би бил кршење на шпанскиот устав.

Администрацијата на лидерот на Каталонија, Карлес Пуџдемон, претходно соопшти дека планира да прогласи независност на покраината на 9 октомври.

Шпанскиот премиер, Маријано Рахој, денеска го повика Пуџдемон да се откаже од прогласувањето независност на Каталонија, напоменувајќи дека „што поскоро треба да соопшти дека нема да има еднострано прогласување независност, со што би се избегнало поголемо зло“.

На референдумот, кој се одржа во неделата, 90 отсто од гласачите ја поддржаа независноста на Каталонија. На референдумот гласаа 42,3 отсто каталонски граѓани со право на глас.


Каталонците стапуваат во генерален штрајк


Барселона, 3 октомври, 2017 - 10:48 (META) 

Каталонците денеска стапуваат во генерален штрајк, кој ќе го блокира функционирањето на најголем дел од регионот кој бара независност, односно од одвојување од Шпанија, пренесува „Би-би-си“.

Штрајкот го организираат каталонските синдикати и трговските здруженија, поради, како што се наведува, тешко кршење на правата и на слободите, за време на обидот за одржување на референдумот во неделата.

Шпанските централни власти, врз основа на пресудата на Уставниот суд, го прогласија референдумот за незаконски, но, како што тврдат каталонските власти, 2,2 милиони граѓани гласале и покрај забраната. Неколку стотини лица беа повредени за време на полициската интервенција и претресите во неделата на неколку од избирачките места.

За време на денешниот штрајк, ќе биде прекинат јавниот транспорт и работата на училиштата и на болниците. Се очекува и познатиот фудбалски клуб „Барселона“ да учествува во штрајкот, иако денеска нема закажани натпревари. Како што е најавено, ќе штрајкуваат и универзитетските професрои и другите јавни службеници во Каталонија.


Каталонија и Косово не се споредливи бидејќи Шпанија е во ЕУ, тврди Европска комисија


Брисел, 2 октомври, 2017 - 18:29 (META) 

Европска комисија, која референдумот во Каталонија го прогласи за неуставен, тврди дека случајот со таа шпанска покраина и со Косово и Метохија се неспоредливи затоа што Шпанија е членка на Европска Унија.

– Кога станува збор за признавањето на Косово, тоа беше многу специфичен контекст. Тоа беше позиција усвоена од различни декларации и резолуции на Обединети нации и на меѓународната заедница. Многу специфичен контекст со специфични причини – изјави портпаролот на ЕК, Маргаритис Шинас.

Тој не објасни за кои декларации и резолуции на ОН станува збор, ниту кои се специфичностите што ги спомена.

ЕК во денешната декларација наведе дека, земајќи го предвид шпанскиот устав, вчерашното гласање во Каталонија било нелегално.

„Ги повикуваме сите релевантни учесници бргу да се префрлат од конфронтации на дијалог. Насилството никогаш не може да биде инструмент во политиката. Веруваме дека водството на премиерот Маријано Рахој ќе го реши овој компликуван процес со целосно почитување на шпанскиот устав и на фундаменталните права на граѓаните“, велат од ЕК.


Дури 460 луѓе биле повредени од полицијата, тврди каталонската влада


Барселона, 1 октомври, 2017 - 22:07 (META) 

Во акцијата на шпанската полиција во Каталонија да го спречи референдумот за независност на оваа покраина, се користеше и директно физичко насилство и пендреци и гумени куршуми, јавуваат медиумите.

Во пресметката што се случуваше кога на гласачките места полицијата интервенираше за да го одземе гласачкиот материјал, а граѓани се спротивставуваа, се повредени најмалку 460 цивили и 11 полицајци.

Полицијата дејствуваше по наредба на шпанската влада, откако шпанскиот Уставен суд го прогласи референдумот за нелегален.

Откако гласачките места беа затворени во 20 часот по локално време, шпанскиот премиер Маријано Рахој порача дека Каталонците биле заведени да гласаат на нелегален референдум.

Проблемот со Каталонија, богатиот североисточен регион со 7,5 милиони луѓе, ја втурна Шпанија во најголемата политичка криза уште од времето на судирите со баскиската ЕТА.

Шпанија жестоко одговори на обидот да се организира референдум, со полиција што брутално се нафрли на демонстрантите кои сакаа да ги „осигураат“ гласачките места, преку користење пендреци, жива сила и гумени куршуми.

Во училиштето „Пау Кларис“ во Барселона, според снимката од еден гласач, полицијата многу насилно отстранува луѓе од нејзиниот пат, во еден случај влечејќи лице за коса, а во друг случај туркајќи ги низ скалите.


МНР: Нема повредени македонски државјани во инцидентите во Каталонија


Скопје, 1 октомври, 2017 - 16:52 (META) 

Македонското министерство за надворешни работи (МНР) до попладнево нема информации за повредени граѓани во судирите во Каталонија, каде се одржува референдум за независност, кој шпанската влада го прогласи за нелегален.

Како што соопшти МНР преку својот твитер-профил, досега ниту еден македонски државјанин не побарал помош од македонската амбасада во Шпанија. МНР е во редовен контакт со амбасадата, а сите македонски граѓани на кои им е потребна помош, може да се јават на телефонскиот број +34639255299.

Според неофицијални информации, во Шпанија има околу 1.000 македонски државјани кои престојуваат туристички или работат. Во Шпанија живеат и повеќе илјади бугарски државјани, а со оглед дека одреден број Македонци имаат бугарски пасош, можно е некои од нив при влез во земјата да го употребиле тој пасош.


Во Каталонија пожарникарите ги бранат граѓаните од полицијата


Барселона, 1 октомври, 2017 - 15:43 (META) 

Пожарникарите во шпанскиот регион Каталонија застанаа во одбрана на граѓаните од полициските акции, јави „Индепендент“, откако во денешните интервенции и судири беа повредени неколку стотини лица. Со жив штит, пожарникарите ги двојат граѓаните кои протестираат против полициската бруталност од националните сили. Полициската акција се случуваше во текот на денешниот ден поради наредбата на шпанската влада да се спречи гласањето за независност на Каталонија. Притоа полицајците и пожарникарите и директно се судираа, како што се гледа од видеозаписот.

Истовремено, поради големиот број одземен гласачки материјал, каталонската влада објави дека е креирана веб-страница на  блогерската плаформа „Вордпрес“ на која на граѓаните им е овозможено да гласаат на референдумот до полноќ, јави весникот „Ел Мундо“. Пред почетокот на гласањето на референдумот за независност каталонската влада повика избирачите да гласаат во кое било избирачко место што ќе биде отворено.

Весникот „Гардијан“ истовремено објави сведоштво на Хезус Лопез Родригез, 51-годишник кој живее спроти училиштето „Рамон Лул“, каде полицијата претпладнево интервенираше брутално.

– Бевме на улица од 5 часот наутро. Стотици луѓе мирно седевме. Гласачките кутии пристигнаа околу 7.30 часот. Околу 8 часот здогледавме седум полициски комбија. Половина час подоцна полицајците дојдоа со опрема за разбивање демонстрации, со штитови и со шлемови. Ни рекоа дека Каталонскиот врховен суд им наредил да ги одземат гласачките кутии и ни рекоа да се разотидеме. Одговоривме „Не, не, не!“. Потоа околу 20 полицајци се нафрлија на нас. Траеше кратко – околу две минути, но останавме заедно. Потоа командирот им рече да се повлечат. Но, тие стоеја тука околу 15 минути.  Потоа дојдоа осум или девет комбија на националната полиција и ги затворија околните улици. Се туркавме додека не почнаа да апсат. Поочнаа насилнички да извлекуваат луѓе, ние дававме отпор, но полицајците клоцаа и фрлаа луѓе на земја. Дојдоа уште околу 100 полицајци. Кога видоа дека не можат да влезат во објектот, ја прескокнаа оградата и влегоа. Со секири ги искршија вратите на училиштето и влегоа, а излегоа по десет минути со гласачките кутии – вели Родригез.

Откако полицијата изврши неколку брутални упади на избирачки мести, почна да се пресметува со граѓаните на улиците, а почна и да пука со гумени куршуми по луѓето. При полициските интервенции на гласачките места, каде се одржува референдумот за независност на Каталонија, кој шпанската власт го прогласи за нелегален, на улиците на Барселона, вториот најголем град во Шпанија, се слушаа истрели на гумени куршуми и испукување гранати со солзавец. Граѓаните поставуваа метални бариери на улиците, а полицијата со комбија со засилени браници напред ги истуркува.

Хорди Турул, портпарол на движењето за независност на Каталонија, вели дека досега 337 луѓе се повредени во судирите.


Во акцијата на полицијата во Каталонија најмалку 38 лица се повредени


Барселона, 1 октомври, 2017 - 12:39 (META) 

Досега се регистрирани 38 повредени лица, најголемиот дел од нив со помали повреди, сооштија здравствените органи во Каталонија, додека во оваа шпанска покраина се случува масовна полициска акција со брутално насилство за да се спречи референдумот за осамостојување на Каталонија од Шпанија.

Каталонскиот водач Карлес Пуџдемон го осуди, како што рече, „неоправдливото насилство“ од шпанската држава.

Гласачкото ливче за референдумот има само едно прашање „Дали сакате Каталонија да стане независна држава, со републиканско уредување?“, под кое има два квадрати за штиклирање на одговорите „Да“ или „Не“.