Каракачанов и новинарот во натпревар против Македонија со антиката и средновековјето


Скопје, 14 јануари, 2019 - 10:33 (META) 

Во обемно интервју со Красимир Каракачанов, бугарски вицепремиер и министер за одбрана, како и претседател на бугарската националистичка партија ВМРО-БНД, емитувано на 8 јануари на бугарската радиомрежа „Фокус“, новинарот изобилно ја користеше реториката на познатиот негатор на македонската нација дотолку што интервјуто изгледа како двајцата да се обединиле против Македонија. Односно, како Каракачанов да ги пишувал прашањата што новинарот потоа требало само да ги прочита.

Радиомрежата „Фокус“ е дел од новинската групација „Фокус“ на Красимир Узунов, бугарскиот новинар и бизнисмен познат исто така како еден од најгласните пропагатори на тезата за апсолутно бугарско потекло на Македонците. Затоа и не зачудува премногу што тука се емитува големо интервју со еден од најголемите напаѓачи на македонскиот народ. Она што сепак зачудува е што новинарот што го води интервјуто ја користи истата, инаку досега добро позната, реторика на гостинот, настапувајќи со фрази и конструкции што потоа Каракачанов ги повторува и проширува.

Прашањата се полни со коментари и остри зборови од типот на тоа дека официјално Скопје и македонскиот премиер Зоран Заев „ја потклоцнуваат“ Бугарија, како и дека македонските претставници во Заедничката мултидисциплинарна експертска комисија за историски и образовни прашања, формирана согласно Договорот за пријателство, добрососедство и соработка меѓу Република Македонија и Република Бугарија „сакаат да го присвојат наследството на Бугарија во антиката, средновековјето и Преродбата“, па преку тоа дека „премиерот и министерот за надворешни работи на Бугарија требало да седнат на средба со своите колеги во Македонија и да се „отстрани тоа глупаво однесување еднаш засекогаш“.

Овде новинарот ја пречекорува границата на професионално водење интервју и пречекорува од областа на новинарска работа во непрофионален пропагандизам.


Воскреснувајќи го т.н. „Крвав Божик“ од 1945 г. во Македонија, бугарските медиуми го воскреснуваат националистичкиот мит


Скопје, 10 јануари, 2019 - 11:00 (META) 

Голем број бугарски медиуми во понеделникот, на денот на одбележувањето на Божик во Македонија излегоа со потсетување на, како што велат, „Крвавиот Божик“ од 7 јануари 1945 година, кога на територијата на сегашна Република Македонија, а тогашна Демократска Федерална Македонија, биле убиени „1.200 Бугари“.

За илустрација ќе го земеме текстот објавен од faktor.bg, каде покрај ова тврдење се зборува за многу поголема бројка убиени Бугари во периодот што следува:

На 7 јануари 1945 година, по наредба на крвавиот диктатор Тито, кој е Хрват по потекло, и список, составен од Лазар Колишевски, во Вардарска Македонија се убиени без суд и пресуда, 1.200 Бугари. Целта била да се избрише бугарското самосознание и да се забрза процесот на македонизација на населението. Само во првиот ден на Коледа – 7 јануари (во Македонија Коледа се нарекува Божик и се чествува според јулијанскиот календар) во Скопје се убиени 63 луѓе, во Велес – 54, во Куманово – 48, во Битола – 36, во Штип – 77, во Прилеп – 35, крај селото Владимирово, Беровско – 330 луѓе, а телата на убиените во Велес за закопани зад црквата „Свети Спас“ и кај Пуста Кула.

Во „Фактор.бг“ се наведува и дека „во следните неколку седмици во Охридско и Преспанско биле убивани цели семејства, по што телата им биле фрлани во Охридско Езеро и Преспанско Езеро или по падините на планината Галичица кај селото Отешево“:

Утврдено е убивањето на над 23.000 што се изјасниле како Бугари, а други 130.000 Бугари биле иселени, прогонети или испраќани во концентрациониот логор „Голи Оток“ или затворот „Идризово“.

Иако е несомнено дека некои од убиените, затвораните и прогонетите се чуствувале како Бугари, во отсуството на некаква документација што би ја потврдила толку големата бројка убиени во период од само неколку дена или седмици (на пример, во Владимирово и ден-денес никој не зборува ниту за 30, а камоли 300 убиени во само еден ден). Интересно е што во таа бројка што ја изнесуваат бугарските медиуми се внесени и офицери и војници што одбиле да одат на Сремскиот фронт бидејќи сакале да одат да го освојуваат Солун. Иако за речиси сите од нив биле изречени смртни пресуди, но тие не биле убиени, туку смртните пресуди биле потоа поништени.

Дополнително, од она што го утврди македонската историографија, но и искази за медиумите  давани по настапувањето на плурализмот на некои од затвораните, голем број од убиваните и затвораните биле цврсти заговорници на идејата за независна и голема Македонија, а голем број биле и помагачи на партизанското движење, како што е случајот со убиениот велешки лекар Богдан Поп Ѓорчев.

Несомнено е и дека, како што утврди македонската историографија по падот на социјализмот во 1991 година, дека голем број од убиваните и прогонуваните биле идеолошки противници на новата власт, односно биле само антикомунисти, а нивните имоти и богатства веднаш по егзекуциите и интернациите биле доделувани на новото раководство, што создава доволно сомнеж дека станувало збор за најгруба злоупотреба на власт и убивање преку набедување само заради лесно стекнување туѓ тешко спечален имот.

Дополнително, претседателот на двете заседанија на АСНОМ и прв претседател на Народното собрание на Македонија, Методија Андонов – Ченто, бил прогонуван и затворен но поради македонски национализам и идеи за независна Македонија. Нешто за што бил затворан и во Кралството СХС и при бугарската окупација.

Дополнително, како што несомнено потврдуваат и голем број од преживеаните затвореници од средината на 20. век во Идризово и интернираните во Голи Оток, нивни „цимери“ покрај неколкумина Бугари по убедување, биле голем број  комунисти по убедување, но поддржувачи на резолуцијата на Информбирото за Југославија во 1948 година, со кои тогашната власт безмилосно се пресметува.


Грците и Македонците им ги поскапеа старите автомобили на Бугарите


Дупница, 4 јануари, 2019 - 12:20 (META) 

Поради големиот интерес на Грците и Македонците за поеколошки користени автомобили, на автоплацевите во бугарскиот град Дупница, тие стануваат сè поскапи и понедостапни за Бугарите што не може да си дозволат нов автомобил, а сакаат посочуван автомобил на старо со повисока еколошка класа, јавува Бугарската национална телевизија (БНТ).

Поради повисоките даноци за старите автомобили, кои на почетокот на годинава стапија на сила во Бугарија, пак, сè поголем е интересот за купување нови автомобили за сметка за старите, што ги загрижува продавачите на користени автомобили увезени од странство.

Постарите и „повалкани“ увезени автомобили остануваат за помалку имотните Бугари, но и тие не среќни со таквиот избор, бидејќи од 1 јануари годинава даноците за автомобилите што повеќе загадуваат се покачија за отприлика 30 отсто.

Причината за напливот на Грци и Македонци на автоплацевите во Дупница, која важи за своевидна „мека“ за увезени автомобили е што цените таму се пониски отколку во Грција и Македонија.

– Бараат од 2005-2006 година, со евро 4 и евро 5, такви коли се бараат. Постарите се за Бугарите кои сакаат поевтини коли – вели за БНТ продавачот Стојчо Стојчов.

Но, оние Бугари што сакаат поеколошки користен автомобил се соочуваат со поскапување предизвикано поради големиот интерес од Грците и Македонците.

– Барам за околу 3.000 лева, тие бараат околу 4.000 лева, значи поскапувањето е за околу 1.000 лева, и тоа го објаснувам со интересот на Грците – објаснува Бугаринот Борис Крушевски.

Продавачите на увезени автомобили велат дека речиси и не се бараат возила со дизел мотори, а интересот е за бензинци. Затоа и најголемиот број автомобили што се увезуваат се бензинци, велат трговците со автомобили.

Бугарскиот парламент на 7 ноември минатата година ги донесе долгонајавуваните измени, со кои се воведува повисок данок за старите автомобили и камионети со вкупна тежина до три и пол тони кои многу загадуваат.

Со измените се воведе нов принцип на определување на годишниот данок, преку две компоненти – моќноста на моторот и годината на автомобилот од една страна и еколошката компонента, која ќе биде дефинирана од општинските совети во зависност од еколошката категорија на автомобилот.

Токму втората, еколошката компонента, носи даночно олеснување за автомобилите со стандард Евро 4 или повисок, а поголеми издатоци за оние од пониските Евро стандарди или кои воопшто не влегуваат во оваа категоризација.

И Македонија воведува нови мерки, со кои ќе се воведат еколошки налепници за автомобилите и потоа при енормно загадување на воздухот ќе го ограничува движењето на возилата што повеќе загадуваат. Но начинот на кој се планира тоа да се прави е критикуван од експертите и екологистите.


Почина бугарскиот историчар Божидар Димитров, познат по антимакедонизмот


Софија, 2 јули, 2018 - 9:55 (META) 

Божидар Димитров, бугарскиот професор, историчар и археолог, поранешен директор на Агенцијата за Бугарите во странство и поранешен директор на Националниот историски музеј, познат пропагатор на ставовите за бугарскиот идентитет на Македонците, починал во Софија на 72 годишна возраст, јавија бугарските медиуми.

Тој починал вчера пред 20 часот пред зградата во Софија во која што живеел. Во еден момент се фатил за градите, а потоа се струполил.

Димитров по осамостојувањето на Македонија многу пати во јавните настапи се залагаше за тезата за еден етнички идентитет на Македонците и Бугарите, а издаде голем број статии и публикации во кои ја бранеше својата теза со разни историски случувања со последните милениум и половина.


Раководството и сопственикот на Фабрика за кабли Неготино добија кривични пријави


Неготино, 14 јануари, 2018 - 14:45 (META) 

Полициската станица Неготино поднела кривична пријава против Г.Х. (47),генерален директор на АД „ФКН“ (Фабрика за кабли Неготино), против Ј.Ј. (37) претседателот  на одборот на директори на АД „ФКН“, против двајца членови на одборот на директори на АД „ФКН“, сите од Република Бугарија, како и против Љ.К. (61) од Велес, исто така член на одборот на директори.

Тие се товарат за злуопотреба на службената положба и овластување, но и за намерно предизвикување стечај, како и за оштетување или повластување на доверители и за фалсификување службена исправа. Како што наведува неготинската полиција, малверзациите биле со цел да се префрли имотот и сопственоста на АД ФКН врз друга фирма од Бугарија.

Кривични пријави за помагање добиле уште двајца Бугари, односно Ј.С. (41), сопственик и управител на ФКН ДООЕЛ Неготино и С.С. сопственик и управител на “Мега Ел ООД“ Софија, која е мнозински акционер во АД „ФКН. Нив полицијата ги товари за помагање во извршување на кривично дело.

Според пријавата, раководителите на АД ФКН во 2007 ја задолжиле фабриката кај една банка и под хипотека го ставиле целиот движен и недвижен имот, при што во спогодба со банката е наведена помала вредност на тој имот. Потоа во повеќе наврати од 2007 до 2010 година со двајцата сопственици и управители на другите фирми вршеле зделки со долгот, без одобрение од Собрание на акционери на АД „ФКН“ Неготино.

Раководството на Фабриката за кабли се товари и дека на ФКН ДООЕЛ му ги отстапиле сите договори, лиценци и сертификати за производство, со намера да го префрлат целокупниот имот во сопственост на „ФКН“ ДООЕЛ.

На овој начин АД „ФКН“ Неготино станало трајно неспособно да ги извршува обврските кон другите доверители и со тоа извршиле оштетување на останатите доверители, акционери и на Република Македонија за износ од 847.217.663 денари, вели полицијата.


ВМРО-ДПМНЕ: СДС направи преседани во правото и создаде нова криза


Скопје, 6 мај, 2017 - 10:18 (META) 

„Заев и СДС покрај политичката криза, ја турнаа Република Македонија и во правна криза. Создадоа правни преседани со кои во иднина се отвора можност за незаконско гласање на двојазичноста, двојазични банкноти и униформи, геноцид и сите други елементи од тиранската платформа, без притоа да се почитува волјата на граѓаните“, се вели во редовното утринско соопштение на ВМРО-ДПМНЕ.

Од партија велат дека Заев и СДСМ четврти ден молчат за албанските знамиња во кабинетот на „нелегално избраниот од нивна страна претседател на Собранието, исто како што молчеа и стоеја кога се пееше химната на албанската држава во македонскиот законодавен дом“.

„Заев очигледно ужива кога го навредува Македонецот. Во ист ден ги прогласи Македонците и за Бугари и за Срби. Ваквите антимакедонски ставови на Заев беа пофалени од Божидар Димитров, кој рече дека Заев бил во право и дека Македонците се Бугари, а Струмица од каде што потекнува Заев е бугарски град“, се додава во соопштението на ВМРО-ДПМНЕ.


Пустец ги отфрли амандманите за постоење Бугари во Албанија


Пустец, 28 февруари, 2017 - 21:12 (META) 

Советот на општина Пустец, во Мала Преспа, Република Албанија, на денешната седница едногласно донесе одлука за отфрлање на делот од извештајот напредокот за интеграција на Албанија во Европска Унија.

Во извештајот се споменува и се бара признавање на „бугарско“ малцинство и во региони во кои живеат етнички Македонци во Албанија.

Меѓу другото, во одлуката од Советот на општина Пустец, се укажува и на резултатите на последниот попис од 2011 година одржан во Албанија, каде во општина Пустец се декларирале околу 3.500 резидентни жители како Македонци и ниту еден како Бугарин.


ММДЧП ја осуди Резолуцијата на ЕП во која што се вели дека Македонците се „Бугари”


Чикаго, 18 февруари, 2017 - 10:59 (META) 

Македонското меѓународно движење за човекови права (ММДЧП) ја осуди и бара итно повлекување на Резолуцијата на Европскиот парламент со која се бара да се почитуваат правата на „бугарското население” во албанските региони, Мала Преспа, Голо Брдо и Гора, каде што живеат Македонци.

„Дали Европскиот парламент е неинформиран, или е анти-македонски? Ова се двете единствени можни опции. При бесрамно прикажување на чиста лудост, Европскиот парламент усвои резолуција со која што од Албанија бараат да ги заштити правата на своето „бугарско“ малцинство и тоа во региони во кои што живее македонско население. Па уште и „препорачува, правата на лицата со бугарска националност во областите Преспа, Голо Брдо и Гора законски да се регулираат и спроведат во пракса.“ Европскиот парламент, со оваа ‘бескрајна мудрост’, само и помага на Бугарија во нејзината мисија да го искоренат постоењето на македонското малцинство и на се што е македонско“, велат од ММДЧП.

Од движењето велат дека без дилеми населението во тие области е македонско и дека тоа е факт прифатен од сите, вклучувајќи ги и бројните извештаи за човекови права од страна на Европскиот суд за човекови права, Европската комисија против расизам и нетолеранција, Обединетите нации, американскиот Стејт Департмент, како и меѓународните организации за човекови права.

ММДЧП ги повика европратениците кои што гласаа за резолуцијата да одат и да ги посетат Мала Преспа и Голо Брдо и да поразговараат со локалното население.


„Илинден“ го осудува именувањето на Македонците од Албанија како Бугари


Тирана, 16 февруари, 2017 - 9:59 (META) 

Македонско друштво „Илинден” од Тирана, заедно со огранокот за Голо Брдо, најостро го осудуваат Извештајот за напредокот на Албанија за членство во ЕУ, усвоен од Европскиот парламент, во делот каде што по предлог на бугарските европратеници Андреј Ковачев и Ангел Џамбаски, Македонците во областите Голо Брдо, Мала Преспа и Гора се наведуваат како Бугари.

„Македонско друштво „Илинден” од Тирана и Огранокот за Голо Брдо, повторуваат дека Бугари во Албанија и во регионите Преспа, Голо Брдо и Гора, нема. Потсетуваме дека на целата територија на Република Албанија, и посебно во регионите Преспа, Голо Брдо и Гора не живеат Бугари, туку само Македонци. Од Албанската и од Македонската влада бараме да испратат остар демарш до Брисел и Софија за нотификацијата на лажна бугарска историја во европските службени документи и за преименувањето на Македонците во Албанија за Бугари“ се вели во соопштението на Македонско друштво „Илинден”.

Етничките Македонци од Албанија, овој Извештај го оценија како груба повреда на меѓународното право, Универзалната декларација за човековите права и слободи и Повелбата на Обединети нации.

„Македонско друштво „Илинден” и Огранокот за Голо Брдо апелираат до Брисел за активни мерки против денационализаторската политика што веќе неколку години организирано ја води Софија со незаконско издавање на бугарски државјанства на Македонците во Албанија“, се додава во соопштението.


На Бугарите од Штип им пречи плоча од Втората светска војна


Штип, 14 февруари, 2017 - 16:39 (META) 

Здружението за Македонско – бугарско пријателство во писмо до Советот на Општината Штип, градоначалникот и Советот на родители од Основното училиште „Ванчо Прке“, бара да се тргне спомен плоча од ѕидот на штипското училиште.

Оваа плоча во 1983 година ја поставија борците од Сојузот на здруженија на борци од НОБ како сеќавање дека на местото каде сега е основно училиште, некогаш имало бугарски затвор.

„На ова место во злогласниот бугарски фашистички затвор масовно се затварани борци-комунисти од 1941 до 1944 година. Во него се измачувани, убивани и масакрирани повеќе борци од НОВ. Во знак на почит кон затворениците-борци за слобода на Македонија,“ пишува на плочата.

Петар Колев во писмото во име на здружението пишува дека плочата не одговара на фактите, а се повикува на тоа дека „комунистичкиот режим е објавен за злосторнички во сите источно-европски држави, вклучувајќи ја и Македонија, за што Собранието има донесено соодветна декларација.“

Тој е убеден дека содржината на таквиот текст кој пред се е исполнет со идеолошки предрасуди а не со факти, покажува недостиг на елементарно цивилизациско однесување“.

Дека содржината на плочата не е соодветна на овие времиња, како аргументи Колев нуди податок дека Бугарија му помогнала на Штип да изгради мултимедијален центар, донирала мост, (преку програмата за прекугранична соработка со ЕУ), а многу граѓани на Штип се и граѓани на Република Бугарија, но и многу се во процедура за добивање на државјанство.

Меѓутоа, на овие аргументи остро одговори претседателот на Советот на Општината Штип, Влатко Миташев, кој Колев го нарече минорна фигура, кој премногу романтичарски се занел во историјата.

– Непобитен факт е дека имало бугарски окупатор во Втората светска војна. Не мислам дека ние во денешно време се лутиме на Бугарија или имаме антибугарски ставови во односите меѓу двете држави и покрај тоа што имаме инциденти, како што беше ставот на последниот бугарски претседател, кој рече дека не ја сака македонштината, која ние си ја сакаме. Мислам дека не можеме да дозволиме бришење на колективната меморија, бидејќи ние уште имаме живи луѓе, кои се сведоци, кои го доживеале тоа. Не гледам дека е чин на добрососедски односи ако ние ги тргнеме спомените од минатото. По тој принцип треба да го тргнеме и споменикот на Холокаустот. Имаме еден таков во центарот на Штип. Тие ја признаа својата грешка и треба ли секој ден да ни се извинуваат за тоа?! – изјави Миташев.

Претседателот на штипскиот Совет смета дека иницијативата на Бугарите не е на место и поради фактот дека плочата е сеќавање на едно црно минато и дека децата треба да ги потсетува како сме дошле до своја држава.