МВР соопшти детали за вчерашната акција за апсење криумчари на мигранти при што имало вистинска драма при обидот да го запрат возилото. Основното јавно обвинителство за гонење организиран криминал и корупција претходно соопшти за акцијата, напоменувајќи дека 12 лица се во притвор, а едно во домашен притвор.
Според МВР, акцијата почнала пред повеќе од една година заради сузбивање на групата криумчари, а од 5 септември лани се почнати и посебни истражни мерки по наредба од Јавното обвинителство. Според МВР, организатори на групата за криумчарење мигранти се лица од Авганистан и од Пакистан, кои подолго време биле во Македонија, Србија и во Грција. Нивни помагачи биле и македонски државјани, кои биле водичи, транспортери, сместувачи, извидница, логистика.
При акцијата за апсење вчера, рано наутро на автопатот Велес – Скопје, полицајци се обиделе да сопрат „мерцедес“ за кој имале сознанија дека превезува мигранти. Но, возачот ја пробил блокдата на патот и избегал, потоа биле поставувани и други блокади и избегнувајќи ги, „мерцедесот“ ја скршил и рампата на наплатната станица кај Велешко Езеро и продолжил кон Куманово. Дури кај рафинеријата „Окта“ полицајците успеале да го сопрат автомобилот, во кој покрај возачот се пронајдени и 12 Пакистанци и еден Египќанин.
Во другиот дел од акцијата, биле уапсени 13 лица од групата, кои биле во Куманово, Скопје и во Гевгелија. Полицијата запленила и шест возила, повеќе мобилни телефони, 27.250 евра, пиштол марка „м57“, рамка со четири куршуми и нотес со податоци за лица и износи на парични средства.