Истражителот на Специјалното јавно обвинителство бил приведен во полициската станица Беко бидејќи бил забележан како фотографира објект во сопственост на поранешниот директор на Управата за безбедност и контраразузнавање (УБК), Сашо Мијалков, информираше министерот за внатрешни работи, Оливер Спасовски.
– Тој бил забележан како фотографира објект, го забележало обезбедувањето на поранешниот директор на УБК, Сашо Мијалков. Бил повикан на разговор во станицата Беко. Направен е првичен разговор и по насоки на надлежниот јавен обвинител, земена е изјава од истражителот, како и службени белешки на службените лица што постапувале во моментот и целиот предмет е предаден во Јавното обвинителство, а истражителот е пуштен. Моите информации говорат дека лицето било забележано како фотографира објект за кој нè информираа дека бил објект на господинот Сашо Мијалков – изјави Спасовски.
Одговарајќи на новинарско прашање дали е спорно што истражителот сликал објект и дали е тоа нешто невообичаено, министерот рече дека за него не е спорно, бидејќи и неговата куќа била фотографирана кога го избрале за министер и тоа од претседателот на месниот комитет на ВМРО-ДПМНЕ, на што тој никако не реагирал.
Синоќа министерот Спасовски се сретна со тимот на СЈО, на барање на Јанева, бидејќи двајца истражители беа попречени да си ја извршуваат својата должност.
Како што појасни Спасовски, тој ја поддржува работата на Специјалното јавно обвинителство и судските наредби ќе бидат завршени до крај, откако ќе се отстранат одредени технички пречки.
– Специјалната јавна обвинителка го повлече истражителот поради тоа што имаат недоразбирање во начинот на договор со Управата за безбедност и контраразузнавање и во моментот кога ќе се обезбедат техничките услови, со присуство на човекот од „Ериксон“ ќе се докомплетира постапката, бидејќи веќе две третини од наредбите се извршени – додаде Спасовски.
Обвинителката на СЈО, Ленче Ристоска изјави дека, по добиените гаранции од министерот Спасовски, ќе продолжат со работата во УБК.
