Претседателот на СДСМ, Зоран Заев, денеска се сретна со амбасадорот на Кралството Холандија во Република Македонија, Ваутер Пломп.
„Тема на состанокот била актуелната политичка криза во Македонија, усложнета со едностраната одлука на власта за одржување избори на 5 јуни и со апсурдната одлука на Ѓорѓе Иванов за аболиција на криминалниот врв на власта. Заедничка е констатацијата дека погазувањето на Договорот од Пржино, чија цел се фер и регуларни избори, ја носи земјата кон ризични и многу штетни последици по Република Македонија и нејзините граѓани“, се вели во партиското соопштение.
Во него се додава дека лидерот на партијата посочил дека СДСМ нема да учествува на нерегуларни избори, какви што, според него, ќе бидат тие на 5 јуни, како и дека такви избори нема да дозволи.
„Одлуката за аболиција на криминалците од власта на Ѓорѓе Иванов е оценета како упад во правниот поредок на ниво на државен удар, поради што мора да биде повлечена, а Ѓорге Иванов мора да си замине од функцијата“, стои во соопштението на СДСМ.
