За една седмица, со помош на реформската мерка во примарната здравствена заштита, 2.443 хронично болни пациенти посетиле матичен лекар и биле издадени 5.412 рецепти за хронична терапија. Ова е дел од новините во примарната здравствена заштита, со која се овозможува терапијата која досега ја препишуваа специјалисти, сега да ја препишуваат матичните лекари.
„Станува збор за суштинска новина со која се унапредува процесот на обезбедување здравствени услуги за пациентите и за здравствените работници. За тоа е усвоен нов правилник, со кој се опфатени пациентите со дијабетес, астма, ХОББ, намалена функција на тироидна жлезда и хипертензија, кои сега наместо кај лекар специјалист, хроничната терапија ја добиваат кај својот матичен лекар во местото на живеење“, велат во Министерството за здравство.
Во тек се подготовките и за воведување на новите лабораториски испитувања, со кои на матичните лекари ќе им овозможиме да ја зајакнат нивната улога и во дијагностичка насока.
„Со ова ќе се зајакне улогата и важноста на матичните лекари во здравствениот систем, а и ќе се олесни административниот товар и ќе се намали притисокот врз секундарното и терциерното здравство“, наведено е во соопштението на министерството.
