Околу 23.000 илегални мигранти влегле во Италија во август годинава, а во најголем дел од случаите станува збор за лица што го преминале Средоземно Море, соопшти денеска Агенцијата за контрола на надворешните граници на Европската Унија (Фронтекс).
Од почетокот на годината, во Италија стигнале вкупо 117.900 мигранти, главно со бродови од Либија, а Фронтекс наведува дека овие бројки се на нивото на минатогодишните.
Од агенцијата соопштуваат дека во август било забележано значајно зголемување на бројот на мигранти кои од Турција влегуваат во Грција, вкупно 3.430, првпат по стапувањето на сила на договорот меѓу Европската Унија и Турција за запирање на мигрантскиот бран.
Сепак, оваа бројка претставува смо три отсто од бројот на мигранти што лани во август стигнале на грчките острови од Турција.
Мигрантите кои ја користат грчката рута, најчесто доаѓаат од Сирија, Пакистан, Авганистан или Ирак, додека на италијанската рута, преку Средоземно Море, најчести се мигрантите од Нигерија, Еритреја и од Бангладеш.
