Речиси три недели по смртта, утре попладне, на скопскиот аеродром се очекува од Шпанија да пристигне телото на 33-годишниот штипјанец Сашко Коцев. Погребот ќе се изврши в четврток, во родниот Штип.
За да се пренесе телото на Коцев, кој почина во сообраќајна несреќа, беше организирана донаторска акција. Граѓаните беа повикани да донираат бидејќи семејството не беше во можност да собере повеќе од 4.000 евра за транспорт на телото.
Преку линија на операторот „Вип“, до вчера на донаторската телефонска линија се собрани 71.100 денари или околу 1.150 евра. Со веќе уплатените 1.300 евра, тоа значи дека за две седмици се собрани околу 2.500 евра. Донирале неколку штипски компании, Општината Штип, а во акцијата со 5.000 денари се вклучила и Исламската верска заедница, иако Коцев не е дел од оваа верска заедница.
Македонската амбасада во Шпанија успеала да најде компанија која се понудила за 3.800 евра да го транспортира телото. Првично беше соопштено дека ќе треба околу 4.900 евра. Приватна погребална компанија од Штип бесплатно ќе го преземе телото од скопскиот аеродром, а погребот е на товар на Општината Штип и на ЈП „Исар“.