Комисијата за уставни прашања денеска даде зелено светло за уставните измени. Членовите на комисијата гласаа за дефинирање на бракот само како заедница меѓу еден маж и една жена, основање на меѓународни финансиски зони, Народната банка да се преименува во Централна банка на РМ, во фискалната политика дефицитот е проектиран најмногу на 3 проценти, а јавниот долг на 60 проценти од БДП при носењето на годишниот буџет. Откако ќе се изгласаат измените во Судскиот совет, министерот за правда и првиот човек на Врховниот суд нема да се членови по функција, и се создава можност за тужба и за жалба пред Уставниот суд, а ДРЗ се дефинира како самостоен и независен орган.
На дебатата за дефинирањето на бракот само како заедница меѓу еден маж и една жена, пратеникот од ДПА, Имер Алиу кажа дека има многу поголеми проблеми од бракот и дека власта, наместо со приоритетите, се занимава со маргинални теми.
– Се однесувате како хомосексуалците да чекаат ред пред државните институции за да склучат брак – рече Имер Алиу.
Ромео Тренев од ВМРО-ДПМНЕ на ова му одговори дека е уверен дека повеќе од 95 процентиод граѓаните во РМ го делат ставот кој стои како уставен амандман.
Заменик-министерката за правда, Биљана Бришкоска-Бошкоски, рече дека функционирањето на меѓународните финансиски зони ќе биде уредено со закони што ги исполнуваат највисоките стандарди. Како што појасни Бришкоска-Бочкоски, за овој амандман ставовите се усогласени со Брисел.
За владејачката ВМРО- ДПМНЕ, меѓународните финансиски зони значат можност за влез на нов капитал и за намалување на невработеноста.
Според пратеникот Александар Николовски од ВМРО-ДПМНЕ, сите сегашни критичари на оваа уставна измена ќе го сменат своето мислење кога ќе се соочат со функционирањето на зоните.