Контроверзниот инфлуенсер Ендру Тејт е ослободен од домашен притвор во Романија, додека го очекува судењето за обвиненијата за силување и трговија со луѓе.
Ендру Тејт и неговиот брат Тристан беа уапсени во декември, додека обвинение против нив беше поведено во јуни. Двајцата ги негираат обвиненијата.
Како што пишува Би-би-си, браќата Тејт сега може слободно да се движат низ главниот град Букурешт и локалната област Илфов каде што живеат. Тие мора да се пријават во полиција кога тоа ќе биде побарано од нив и да ја информираат полицијата за секоја промена на адресата.
Истовремено, забрането им е да контактираат со двете романски соработнички кои исто така се обвинети, со сведоците или со наводните жртви и нивните семејства.
Прекршувањето на овие правила може да доведе до нивно враќање во куќен или превентивен притвор.
Ендру и Тристан Тејт беа уапсени во нивниот дом во Романија во декември, а три месеци подоцна добија домашен притвор.
Во обвинението против нив се вели дека браќата заедно со уште две романски соработнички во 2021 година формирале организирана криминална група за трговија со луѓе во Романија и во други земји како САД и Обединетото Кралство.
Во обвинението се спомнуваат седум наводни жртви за кои се вели дека биле регрутирани од браќата Тејт преку лажни ветувања за љубов и брак.
„Четворицата осомничени се чини дека создале организирана криминална група со цел да регрутираат, вдомат и искористат жени, принудувајќи ги да создаваат порнографска содржина наменета да се види на специјализирани интернет-сајтови за одреден трошок“, рекоа романските обвинители кога беше приведен инфлуенсерот.
Ендру Тејт во моментов има забрана за пристап на Јутјуб, Фејсбук, Инстаграм и ТиктТок.
Тинејџери од Романија раскажуваат како им пристапил контроверзниот инфлуенсер Ендру Тејт
