На прес конференцијата во Скопје, освен за градењето мостови и придобивките од приближувањето на двете земји, грчкиот премиер Алексис Ципрас, зборуваше и за проблемот со лажните вести околу Договорот од Преспа,
Според Ципрас „во изминативе месеци на спроведување на договорот стана забележлив проблемот со лажните вести“.
– Во изминатите месеци додека бевме многу конструктивни во градењето односи, се занимававме со лажните вести, затоа што во Грција наеднаш почна да се кажува дека Договорот од Преспа создал проблеми. Но тие проблеми беа создавани 30 години и Договорот всушност ги решава – рече тој.
И самиот факт дека Ципрас проговори на таа тема во Скопје, укажува на сериозноста на оваа појава – и во двете земји.
Впрочем, само неколку дена порано, на 29 март во Атина, се одржа и грчко-македонска конференција „Лажни вести за Договорот од Преспа“ на која учествуваа и македонски новинари и претставници на граѓанското општество, и на која министерот за информатичко општество и администрација, Дамјан Манчевски соопшти дека дури 10 проценти од сите написи на македонски и на албански јазик за Договорот „имале за цел да презентираат неточни информации како факти“.
Како што потенцираше тој, во периодот од 1 април 2018 до 15 март 2019 година објавени се вкупно 35.261 написи на македонски јазик и 13.995 на албански јазик. Анализите покажуваат дека во просек 10% од овие написи може да се вбројат во информации чија цел не е информирање на јавноста, односно имале за цел да презентираат неточни информации како факти.
