Словенечкиот премиер Миро Церар изјави дека на Европската унија ѝ е потребно заедничко решение за бегалската криза во наредните недели, за да се избегнат евентуалните конфликти меѓу државите.
– Немаме време до пролет, потребно ни е да најдеме решение во наредните неколку недели. Доколку не го направиме тоа, можеме да очекуваме конфликти меѓу државите – изјави Церар.
Тој додаде дека ситуацијата со мигрантите е надвор од контрола и нема никаква врска со хуманост, интеграција и со помош.
Министрите за внатрешни работи на земјите-членки на ЕУ, в понеделник во Амстердам ќе разговараат за продолжување на привремените гранични контроли во шенген-зоната, за да се контролира приливот на мигранти.
