Белгискиот премиер Шарл Мишел изјави дека терористи, по примерот на масакрот во Париз, подготвувале напади со оружје и самоубиствени напади на повеќе места во Брисел, поради што денеска е прогласен највисок степен на тревога.
Мишел рече дека по итното заседание на Советот за национална безбедност е одлучено да се запре сообраќајот во бриселското метро и трамвајот кој оди под земја, а на улиците на градот да се зголеми полициското и военото присуство.
Истовремено, откажан е и денешниот концерт на францускиот рок-пејач Џони Холидеј, како и фудбалски натпревари и други манифестации.
Премиерот побара жителите да ги почитуваат сите упатства за безбедност и да се информираат само преку официјалните соопштенија.
Владата ги повика граѓаните да бидат внимателни и оти засега нема причина за каква било паника.
Според полициските сознанија, можни цели на нападите биле трговските центри, прометните улици и сообраќајната инфраструктура.
Сопствениците на продавници и на слични објекти во центарот на Брисел се повикани да ги затворат, а на пристапите до главниот плоштад Гран плас се поставени барикади, на кои полицијата ги претресува минувачите. На покривите на околните згради се поставени полициски и воени снајперисти.