Тензична е атмосферата на протестот во близина на штабот на ВМРО-ДПМНЕ. Неколку стотици демонстранти, кои пред еден час пристигнаа пред Владата, повторно се вратија пред седиштето на ВМРО-ДПМНЕ. Граѓанските активисти кои таму беа собрани, гласно негодуваа кога им се приклучија лидерот СДСМ Зоран Заев и партиското раководство.
Во еден момент толпата извикувајќи „Спуштете ги штитовите“ и „Полициска држава“, се обиде но не успеа да го пробие полицискиот кордон околу седиштето на ВМРО-ДПМНЕ.
Демонстрантите, предводени од лидерот на СДСМ, Зоран Заев и од партиското раководство, претходно ги исполнија двете коловозни ленти пред Владата и го блокираа булеварот. Протестот се одвише мирно, без полициско присуство. На моменти, некој од демонстрантите со јајца ја гаѓаше владината зграда.
Стотици граѓани денеска излегоа на улиците да го изразат своето незадоволството од денешната одлука на претседателот Иванов за амнестија и за аболиција на политичари.
