Лидерот на талибанците, Мула Омар, починал пред две години во болница во Пакистан, изјавил за „Би-Би-Си“ портпаролот на авганистанските безбедносни служби, Абдул Хасиб Седики.
Според Седики, Мула Омар починал од здравствени проблеми во 2013 година во болница во Пакистан.
Од авганистанската влада, пак, соопштиле дека во тек е истрага во врска со тврдењата за смртта на Омар.
Изминатиов период во медиумите се појавија повеќе информации дека лидерот на талибанците е мртов, но последните се земаат посериозно бидејќи доаѓаат од високи извори.
Според „Би-Би-Си“, се очекува наскоро со изјава да излезат и претставниците на талибанците. Извори од двата главни совета на талибанците во Куета и во Пешавар во Пакистан за британскиот национален сервис изјавиле дека во тек биле интензивни разговори околу наследникот на Мула Омар.
Во меѓувреме, потврда за смртта на талибанскиот лидер пристигнала и од луѓе блиски до претседателот на Авганистан, Мухамад Ашраф Гани.
Од пакистанската влада и од безбедносните служби во земјата засега не ги коментираат тврдењата за смртта на Мула Омар.
